పులివెందులలో వైయస్ జగన్ పై పోటీకి వైయస్ వివేకానందసై

కడప: ఉప ఎన్నికల్లో కాంగ్రెసు పార్టీ అధిష్టానం ఆదేశిస్తే పులివెందుల నుండి పోటీ చేయడానికి సిద్ధంగా ఉన్నానని దివంగత ముఖ్యమంత్రి వైయస్ రాజశేఖరరెడ్డి తమ్ముడు వైయస్ వివేకానంద తేల్చి చెప్పారు. పార్టీ తనకు పోటీ చేయమని ఆదేశిస్తే జగన్ పై కూడా పోటీ చేస్తానన్నారు. దీంతో వైయస్ కుటుంబంలో చిచ్చు రేగింది. వివేకానంద కాంగ్రెసు పార్టీలోనే కొనసాగుతానని స్పష్టం చేశారు. ఈ విషయాన్ని జగన్ కు కూడా తాను చెప్పినట్లు చెప్పారు. పార్టీ తనకు మంత్రి పదవి ఇస్తే తీసుకుంటానన్నారు. అయితే మంత్రి పదవి వస్తుందో లేదో తనకు తెలియదన్నారు. చివరి వరకు పార్టీలోనే ఉంటానన్నారు.

ఏఐసిసి అధ్యక్షురాలు సోనియా గాంధీపై ఆయన అభినందన వర్షం కురిపించారు. సోనియా మహోన్నత నేత అన్నారు. ప్రపంచంలోనే ప్రభావితం చేసే మహిళలో సోనియా ముందున్నారన్నారు. తన అన్న కాంగ్రెసు ఎప్పుడు అనుకూలంగా ఉండేవాడని, నేను అన్నబాటలోనే నడుస్తానన్నారు. జగన్ పార్టీలోనే ఉండి ఉంటే సోనియా మంచి అవకాశమిచ్చే వారన్నారు. కాగా వివేకానంద కాంగ్రెసు లోనే ఉంటాననిచెప్పడంతో అబ్బాయ్ వైయస్ జగన్మోహన్ రెడ్డికి బాబాయ్ వైయస్ వివేకానందకు మధ్య దూరం మరింత పెరిగింది.