వైయస్ వివేకానందరెడ్డికి హోం: బొత్స సత్యనారాయణకు డిప్యూటీ సిఎం?

హైదరాబాద్: ముఖ్యమంత్రి కిరణ్ కుమార్ రెడ్డి మంత్రివర్గం దాదాపు ఖరారయినట్లు తెలుస్తోంది. మంగళవారం కిరణ్ కుమార్ రెడ్డి గవర్నర్ ను కలిశారు. కాగా పార్లమెంటు సభ్యత్వానికి, పార్టీ సభ్యత్వానికి రాజీనామా చేసిన జగన్మోహన్ రెడ్డి వివాదం దృష్ట్యా ఆఖరులో మార్పులు చేర్పులకు కూడా అవకాశం ఉంది. జగన్ ఎఫెక్టుతో మంత్రివర్గ కూర్పు దాదాపు తగ్గిన విషయం తెలిసిందే. బుధవారం ఉదయం 10.11 నిమిషాలకు మంత్రివర్గ ప్రమాణ స్వీకారం ఉంటుంది. ఈ ప్రమాణ స్వీకారోత్సవానికి రాష్ట్ర వ్యవహారాల ఇంఛార్జ్ వీరప్ప మొయిలీ రానున్నారు. జగన్ చిన్నాన్న వివేకానందకు హోంమంత్రి పదవి ఇచ్చే అవకాశముందని సమాచారం.

మంత్రివర్గంలో ఉండే అవకాశమున్నవారు - జె.గీతారెడ్డి, దామోదర రాజనర్సింహ, సబితారెడ్డి, కోమటిరెడ్డి రాజగోపాలరెడ్డి, పితాని సత్యనారాయణ, పసుపులేటి బాలరాజు, జూపల్లి కృష్ణారావు, దానం నాగేందర్, ముఖేష్ గౌడ్, గల్లా అరుణకుమారి, డొక్కా మాణిక్యవరప్రసాద్, మోపిదేవి వెంకటరమణ, విశ్వరూప్, పార్థసారథి, అహ్మదుల్లాలు పాతవారు కాగా, జానారెడ్డి, జెసి దివాకరరెడ్డి, ఆనం సోదరులలో ఒకరు, శంకరరావు, డిఎల్ రవీంద్రారెడ్డి, వైయస్ వివేకానంద, టిజి వెంకటేశ్, శైలజానాథ్, బస్వరాజు సారయ్య, తోట నరసింహలు కొత్తగా మంత్రివర్గంలోకి రానున్నారు. కాగా బొత్స సత్యనారాయణకు డిప్యూటీ సిఎం పదవి దక్కే అవకాశం ఉంది.