తెలంగాణను ఆపే శక్తి వైయస్ జగన్ కు లేదు: రెహ్మాన్

హైదరాబాద్‌: తెలంగాణ రాష్ట్ర ఏర్పాటును వైయస్ జగన్ ఆపబోరని, తెలంగాణ రాష్ట్ర ఏర్పాటును ఆపే శక్తి వైయస్ జగన్ కు లేదని మాజీ ఎమ్మెల్సీ రెహ్మాన్ అన్నారు. తమకు వైయస్ జగన్ కావాలి, తెలంగాణా కావాలని ఆయన శుక్రవారం మీడియా ప్రతినిధులతో అన్నారు. కాంగ్రెసు నాయకుడు పాల్వాయి గోవర్దన్ రెడ్డి వంటివారే తెలంగాణను నాశనం చేశారని ఆయన విమర్శించారు. తెలంగాణ నేతకు ఉప ముఖ్యమంత్రి పదవి ఇస్తామని చెప్పిన కాంగ్రెసు నాయకులు ఇప్పుడు మోసం చేశారని ఆయన అన్నారు.

పార్టీకి వెన్నెముక వంటి వైయస్ జగన్ ను కాంగ్రెసు దూరం చేసుకుందని ఆయన అన్నారు. అన్ని జిల్లాల్లోనూ వైయస్ జగన్ కోసం కాంగ్రెసు నాయకులు రాజీనామాలు చేస్తున్నారని, వైయస్ జగన్ ను దూరం చేసుకోవడం వల్ల హైదరాబాదులోని కాంగ్రెసు పార్టీ కార్యాలయం గాంధీ భవన్ కు టూలెట్ బోర్డు పెట్టుకోవాల్సి వస్తుందని ఆయన వ్యాఖ్యానించారు. దక్షిణ భారతదేశంలోనే కాంగ్రెసు పార్టీ తుడిచి పెట్టుకుపోతుందని ఆయన అన్నారు.