విజయనగరం జిల్లాలో ఒకే కుటుంబానికి చెందిన నలుగురు ఆత్మహత్య

విజయనగరం: విజయనగరం జిల్లా కొత్తవలస మండలంలోని ముసిరాం గ్రామంలో ఓ వ్యవసాయ బావిలో దూకి ఇద్దరు పిల్లల సహా దంపతులు ఆత్మహత్యకు పాల్పడ్డారు. ఒకే కుటుంబానికి చెందిన నలుగురు ఆత్మహత్య చేసుకోవడం స్థానికంగా సంచలనం సృష్టించింది. అప్పుల బాధతో ఆత్మహత్య చేసుకున్నట్లు రాసిన లేఖ బావి దగ్గర లభించింది. గ్రామంలోనివారు తమను ఇబ్బందులు పెడుతుండడంతో తాళలేక ఆత్మహత్య చేసుకున్నట్లు కూడా ఆ లేఖలో రాసి ఉన్నట్లు చెబుతున్నారు. నాలుగు జతల చెప్పులు అక్కడ ఉన్నాయి.

అక్కడ లభించిన గుర్తింపు కార్డు ప్రకారం భర్త పేరు కె.అప్పలరాజుగా తెలుస్తోంది. విశాఖపట్నం పోర్టు ట్రస్టులో కూలీగా పని చేస్తున్నాడు. కల్లేపల్లిలో ఉంటున్న తన మేనమామ ఇంటికి ముందురోజు వచ్చినట్టు చెపుతున్నారు. భార్యా పిల్లలతో ఆయన ద్విచక్రవాహనంపై వచ్చినట్టు ప్రత్యక్షసాక్షులు చెప్పారు. వీరు విశాఖపట్నం జిల్లా కైలాసపురం వాసులని తెలుస్తోంది.