హైదరాబాదులో ప్రాణాలకు, ఆస్తులకు రక్షణ కల్పించాలి: బాబు

హైదరాబాద్: హైదరాబాదులో ప్రాణ నష్టం, ఆస్తి నష్టం జరగకుండా భద్రతా చర్యలు తీసుకోవాల్సిన బాధ్యత ప్రభుత్వం తీసుకోవాలని ప్రతిపక్ష నాయకుడు నారా చంద్రబాబు నాయుడు డిమాండ్ చేశారు. హైదరాబాదులో వివిధ ప్రాంతాల నుంచి వచ్చినవారు నివాసం ఉంటున్నారని, వారి ప్రాణాలకు, ఆస్తులకు నష్టం వాటిల్లకుండా ప్రభుత్వం చర్యలు చేపట్టాలని ఆయన అన్నారు. విద్యార్థులపై కేసుల ఎత్తివేతపై హోం మంత్రి సబితా ఇంద్రారెడ్డి ప్రకటన చేసిన తర్వాత జరిగిన చర్చలో ఆయన సోమవారం పాల్గొన్నారు. తెలంగాణ ఉద్యమం సందర్భంగా జర్నలిస్టులు కోల్పోయిన పరికరాలను తిరిగి ఇస్తామని ప్రభుత్వం హామీ ఇచ్చిందని, ఆ హామీని నిలబెట్టుకోవాలని ఆయన అన్నారు.

విద్యార్థులపై పెట్టిన కేసులన్నింటినీ ఎత్తేయాలని ఆయన ప్రభుత్వాన్ని డిమాండ్ చేశారు. విద్యార్థులకు పరీక్షలు వస్తున్నాయని, పరీక్షల సమయంలో కేసుల విచారణకు తిరుగుతూ విద్యార్థులు టెన్షన్ కు గురవుతారని, కేసులను ఎత్తేసి వారు ప్రశాంతంగా చదువుకోవడానికి వీలు కల్పించాలని ఆయన అన్నారు.