చిరంజీవి శాసనసభ సభ్యత్వానికి రాజీనామా చేస్తారా?

హైదరాబాద్: తన శాసనసభ సభ్యత్వానికి చిరంజీవి రాజీనామా చేయవచ్చుననే వార్తలు వస్తున్నాయి. ప్రజారాజ్యం పార్టీని కాంగ్రెస్‌లో విలీనం చేసేందుకు భారీ బహిరంగ సభను నిర్వహించనున్నట్టు ఆయన చెప్పిన విషయం తెలిసిందే. ఆ సభకు ముందే ఆయన రాజీనామా చేసే అవకాశాలున్నట్లు చెబుతున్నారు. రాజీనామా చేసి కాంగ్రెస్ టిక్కెట్‌పై తిరిగి పోటీ చేసి గెలుపొందాలనే ఆలోచనలో ఆయన ఉన్నట్లు తెలుస్తోంది. తద్వారా తన నైతికను నిరూపించుకోవడమే కాకుండా, కాంగ్రెస్‌లో విలీనమైనా తాను నంబర్‌వన్‌గానే ఉంటాననే సందేశాన్ని ప్రజలకు పంపించాలనే పట్టుదలతో ఉన్నట్టు సమాచారం.

వైయస్ జగన్ బాటలో నడిచే ఉద్దేశంతో చిరంజీవి ఉన్నట్లు తెలుస్తోంది. కాంగ్రెసు నుంచి వైదొలుగుతూ జగన్ తన పార్లమెంటు సభ్యత్వానికి రాజీనామా చేసిన విషయం తెలిసిందే. తిరిగి ఆయన తన సొంత పార్టీపై పోటీ చేయాలని నిర్ణయించుకున్నారు. అదే తరహాలో రాజీనామా చేసి చిరంజీవి కాంగ్రెసు టికెట్‌పై గెలవాలని అనుకుంటున్నట్లు తెలుస్తోంది. తెలుగుదేశం పార్టీ నాయకులు, వైయస్ జగన్ వర్గం నాయకులకు ఆ రకంగా ఆయన జవాబు చెప్పాలని భావిస్తున్నట్లు తెలుస్తోంది. అందుకు గాను, విలీన సభను చిరంజీవి వేదికగా మార్చుకునే అవకాశం ఉంది. తన రాజీనామా విషయాన్ని ఆ సభలో ప్రకటిస్తారని చెబుతున్నారు.

English summary

Chiranjeevi may resign for his MLA post, before merger of his Prajarajyam in Congress. It is learnt that, he wants resign from Tirupati Assembly seat in bid to reelect from the same seat on Congress ticket to prove his moral values.