కాంగ్రెసుతో తెగదెంపులకు డిఎంకె రెడీ, రాజీనామా బాటలో మంత్రులు

By Pratap

Published: Monday, March 7, 2011, 12:12 [IST]

న్యూఢిల్లీ: కాంగ్రెసుతో తెగదెంపులకు తమిళనాడు ముఖ్యమంత్రి కరుణానిధి నాయకత్వంలోని డిఎంకె సిద్ధమైంది. రాజీనామాలు చేసేందుకు డిఎంకె మంత్రులు ఢిల్లీ చేరుకున్నారు. యుపిఎ మంత్రివర్గంలో డిఎంకెకు చెందినవారు ఆరుగురు ఉన్నారు. శాసనసభ ఎన్నికల్లో సీట్ల సర్దుబాటుపై చర్చలు బెడిసికొట్టడంతో కాంగ్రెసుతో తెగదెంపులు చేసుకోవాలని కరుణానిధి నిర్ణయం తీసుకున్నారు. ఈ స్థితిలో నిర్ణయంపై పునరాలోచన చేయాలని కేంద్ర మంత్రి, కాంగ్రెసు సీనియర్ నేత ప్రణబ్ ముఖర్జీ డిఎంకె నాయకుడు టిఆర్ బాలును కోరారు. అధికారం తనకు లేదని, తమ పార్టీ అధ్యక్షుడు కరుణానిధి నిర్ణయం తీసుకోవాల్సిందేనని ఆయన ప్రణబ్ ముఖర్జీకి చెప్పారు.

ప్రధాని అపాయింట్‌మెంట్ కోరామని, ఆరుగురు మంత్రులం కూడా రాజీనామా చేస్తామని డి. నెపోలియన్ మీడియా ప్రతినిధులతో చెప్పారు. ఆయితే, వారికి ఇంకా ఆపాయింట్‌మెంట్ లభించలేదు. కాగా, కరుణానిధితో ఢిల్లీలోని కాంగ్రెసు నాయకులు సంప్రదింపులు జరుపుతున్నట్లు సమాచారం. డిఎంకెకు చెందిన అళగిరి, దయానిధి మారన్, ఎస్ఎస్ పళనిమాణిక్యం, జగద్రక్షకన్, డి నెపోలియన్, ఎస్ గాంధీసెల్వన్ ప్రధాని డాక్టర్ మన్మోహన్ సింగ్ మంత్రివర్గంలో ఉన్నారు.

Published On March 7, 2011