పాటియాలా హౌస్ కోర్టు వెలుపల సురేష్ కల్మాడీపైకి స్లిప్పర్

By Pratap

Published: Tuesday, April 26, 2011, 15:57 [IST]

న్యూఢిల్లీ: కామన్‌వెల్త్ క్రీడల నిర్వాహక కమిటీ మాజీ చైర్మన్ సురేష్ కల్మాడీపైకి స్లిప్పర్లు విసిరారు. న్యూఢిల్లీలోని పాటియాలా హౌస్ కోర్టు వెలుపల ఈ సంఘటన చోటు చేసుకుంది. కామన్‌వెల్త్ క్రీడల కుంభకోణం కేసులో సిబిఐ అధికారులు కోర్టుకు తీసుకుని వెళ్తుండగా మంగళవారం కల్మాడీపైన స్లిప్పర్లు పడ్డాయి. ప్రత్యేక కోర్టు ముందు హాజరు పరచడానికి పోలీసులు అతన్ని తీసుకుని వచ్చినప్పుడు కోర్టు ఆవరణలోకి ప్రవేశించగానే ఓ వ్యక్తి కల్మాడీపైకి స్లిప్పర్లు విసిరాడు.

కల్మాడీపైకి స్లిప్పర్లు విసిరిన వ్యక్తిని కపిల్ ఠాకూర్‌గా గుర్తించారు. అతన్ని పోలీసులు అదుపులోకి తీసుకున్నారు. కల్మాడీపై మోసం, కుట్ర, అవినీతి చర్యలతో కాంట్రాక్టులు కట్టబెట్టారని కేసులు నమోదు చేశారు. టైమింగ్ స్కోర్ రిజల్ట్ సిస్టమ్ కోసం స్విస్ కంపెనీకి కల్మాడీ అక్రమంగా కాంట్రాక్టులు కట్టబెట్టారని, దీని వల్ల ప్రభుత్వ ఖజానాకు 95 కోట్ల రూపాయల నష్టం వాటిల్లిందని ఆరోపిస్తున్నారు.

Published On April 26, 2011