చిరంజీవి ముఖ్యమంత్రి కోరిక తప్పు కాదు: ఎమ్మెస్సార్

హైదరాబాద్: చిరంజీవి ఒక్కడే తాను ముఖ్యమంత్రి రేసులో ఉన్నానని ప్రకటించలేదని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ కూడా ఇటీవల తాను ముఖ్యమంత్రి రేసులో ఉన్నట్టు ప్రకటించారని ఆర్టీసీ చైర్మన్ ఎం సత్యనారాయణ రావు బుధవారం విలేకరులతో మాట్లాడుతూ అన్నారు. వారు అలా కోరుకోవడంలో తప్పులేదన్నారు. కాంగ్రెసు పార్టీలో ముఖ్యమంత్రి కావాలని కోరుకునే వారు చాలా మంది ఉన్నారన్నారు. తాను రాజీనామా చేసేందుకు సిద్ధంగా ఉన్నానని ప్రకటించారు. దివంగత ముఖ్యమంత్రి వైయస్ రాజశేఖరరెడ్డి ముఖ్యమంత్రి అయ్యే అవకాశం తానే ఇచ్చానని అన్నారు.

ప్రత్యేక తెలంగాణ రాష్ట్రంపై కేంద్రం త్వరగా నిర్ణయం తీసుకోవాలని ఆయన అన్నారు. తెలంగాణకు ప్రాంతీయ బోర్డులు, ప్రత్యేక ప్యాకేజీలు అవసరం లేదన్నారు. తెలంగాణ నేతలకు పదవులు ఇచ్చినంత మాత్రాన కూడా సరిపోదన్నారు. తమకు తెలంగాణ రాష్ట్రమే ముఖ్యమన్నారు. తరుచుగా డీజిల్ రేట్లు పెరుగుతున్నాయని ఆయన ఆవేదన వ్యక్తం చేశారు. బస్సు ఛార్జీలు పెంచడం తనకు ఏమాత్రం ఇష్టం లేదన్నారు. పార్టీ కోసం అందరూ కలిసికట్టుగా కృషి చేయాలని అన్నారు.

English summary

RTC chairman M Satyanarayana Rao said today that Chiranjeevi ambition is not wrong. He said that many leaders in congress are thinking about CM post.