నేనెరుగ, నేనెరుగ: తెలంగాణపై కిరణ్ కుమార్ రెడ్డి

By Pratap

Published: Thursday, June 30, 2011, 9:29 [IST]

న్యూఢిల్లీ: తెలంగాణపై కాంగ్రెస్ అధిష్ఠానం ఏం చెబితే దాన్ని తాను పాటిస్తానని, తనకంటూ వ్యక్తిగత అభిప్రాయం ఏదీ లేదని సీఎం కిరణ్ కుమార్ రెడ్డి అన్నారు. తెలంగాణకు ప్రాంతీయ అభివృద్ధి మండలిని ఏర్పాటు చేస్తారన్న వార్తల నేపథ్యంలో కాంగ్రెస్‌లోని తెలంగాణ పార్లమెంటు సభ్యులు వ్యక్తం చేసిన ఆందోళనకు సీఎం స్పందించినట్లు తెలిసింది. ఎంపీలు పొన్నం ప్రభాకర్, మందా జగన్నాథం, వి.హనుమంతరావు, సర్వే సత్యనారాయణ, బలరామ్ నాయక్, పీసీసీ మాజీ చీఫ్ డి.శ్రీనివాస్ తదితరులు కిరణ్‌ కుమార్ రెడ్డిని గురువారం రాత్రి ఇక్కడ వేర్వేరుగా కలిశారు.

విశ్వసనీయ వర్గాల సమాచారం మేరకు - తెలంగాణపై తనకు తానుగా ఎలాంటి ప్రతిపాదనలూ అధిష్ఠానం వద్ద చేయడం లేదని ఎంపీలకు సీఎం చెప్పారు. పార్టీ అధ్యక్షురాలు సోనియాగాంధీ, ప్రధాని తదితరులను తాను శుక్రవారం కలుసుకున్నప్పుడు, తెలంగాణపై ఒక స్పష్టత ఏర్పడుతుందని సీఎం అన్నట్లు తెలిసింది. తెలంగాణపై అధిష్ఠానం ఏమనుకొంటోందో తనకు ఇప్పుడేమీ తెలియదని సీఎం చెప్పినట్లు సమాచారం. కిరణ్ మాటలను బట్టి తెలంగాణ అంశంపై కాంగ్రెస్ అధిష్ఠానం శుక్రవారం చర్చించనున్నట్లు వెల్లడవుతోంది.

కాగా, కాంగ్రెస్‌లోని సీమాంధ్ర ఎంపీలు కావూరి సాంబశివరావు, జేడీ శీలం, సుబ్బరామిరెడ్డి కేంద్ర మంత్రులు పళ్లం రాజు, పురందేశ్వరి కూడా కిరణ్‌ను కలుసుకున్నారు. కాంగ్రెస్ రాష్ట్ర వ్యవహారాల ఇన్‌చార్జి గులాంనబీ ఆజాద్‌ను డీఎస్, షబ్బీర్ అలీ, ఎంపీలు కేవీపీ రామచంద్రరావు, జేడీ శీలం, బలరాం నాయక్, మందా జగన్నాథం, పొన్నం ప్రభాకర్, మంత్రి శంకర్‌రావు కలిశారు.

Published On June 30, 2011