అన్నా హజారే దీక్షకు ఢిల్లీ పోలీసుల షరతులు

By Pratap

Published: Saturday, August 13, 2011, 16:23 [IST]

న్యూఢిల్లీ: ప్రభుత్వం ప్రతిపాదించిన లోక్‌పాల్ బిల్లుకు నిరసనగా సామాజిక కార్యకర్త అన్నా హజారే తలపెట్టిన దీక్షకు ఢిల్లీ పోలీసులు షరతులు విధించారు. మధ్య ఢిల్లీలోని పార్కులో అన్నా హజారే దీక్ష రెండున్నర రోజుల్లో ముగిస్తామని హామీ ఇస్తే అనుమతి ఇస్తామని ఢిల్లీ పోలీసులు అన్నా బృందానికి తెలిపారు. అది తమకు అంగీకారయోగ్యం కాదని, అది పూర్తిగా రాజ్యాంగ విరుద్ధమని శనివారం విమర్శించింది. జయప్రకాష్ నారాయణ్ పార్కులో రెండున్న రోజుల పాటు దీక్ష చేయడానికి అనుమతి ఇస్తూ తమకు పోలీసుల నుంచి లేఖ అందిందని అన్నా బృందం సభ్యుడు మనీష్ సిసోడా తెలిపారు.

దానిపై తాము చర్చలు జరుపుతున్నామని, తాము జంతర్ మంతర్ వద్ద కూర్చోవచ్చునని ఆయన అన్నారు. జంతర్ మంతర్ వద్ద దీక్షకు పోలీసులు అన్నా హజారేకు అనుమతి ఇవ్వలేదు. రెండున్నర రోజుల్లో దీక్షను ముగిస్తామని ఢిల్లీ పోలీసులు హామీ పత్రం అడగడం రాజ్యాంగ విరుద్ధమని ప్రశాంత్ భూషన్ అన్నారు. అటువంటి పత్రం ఇచ్చే ప్రసక్తి లేదని ఆయన అన్నారు.

Published On August 13, 2011