గాలి సోదరులను దువ్వుతున్న నితిన్ గడ్కరీ

By Pratap

Published: Sunday, August 14, 2011, 8:47 [IST]

బెంగుళూర్: గాలి సోదరులను బిజెపి జాతీయాధ్యక్షుడు నితిన్ గడ్కరీ దువ్వుతున్నారు. మంత్రి పదవులు దక్కని పరిస్థితిలో పార్టీకి కష్టాలు తెచ్చిపెడతారనే భయంతో వారిని బుజ్జగించే ప్రయత్నాలు చేస్తున్నట్లు అర్థం చేసుకోవచ్చు. గాలి జనార్దన్ రెడ్డి సోదరులను ఆయన కొనియాడారు. కర్ణాటకలో బిజెపి అధికారంలోకి రావడంలో గాలి సోదరుల పాత్ర ఉందని ఆయన అన్నారు. మైనింగ్ కుంభకోణంలో మాజీ ముఖ్యమంత్రి యడ్యూరప్పను, గాలి సోదరులను లోకాయుక్త తప్పు పట్టిన విషయం తెలిసిందే.

ముఖ్యమంత్రి, మంత్రి లేదా పార్లమెంటు సభ్యుడు మాజీ ముఖ్యమంత్రి, మాజీ మంత్రి, మాజీ పార్లమెంటు సభ్యుడు కావడం అతి సాధారణమైన విషయమని, కానీ పార్టీ కార్యకర్త మాజీ కార్యకర్త కాడని ఆయన అన్నారు. గాలి సోదరులు, శ్రీరాములు బిజెపి ముఖ్యమైన కార్యకర్తలని ఆయన అన్నారు. యడ్యూరప్ప దశాబ్ద కాలం పోరాటం, గాలి సోదరుల సత్తా పార్టీని కర్ణాటకలో అధికారంలోకి తెచ్చిందని ఆయన అన్నారు. రింగ్ రోడ్డు పథకానికి నితిన్ గడ్కరీ భూమి పూజ చేశారు.

Published On August 14, 2011