వికీలీక్స్ అసాంజేకు పిచ్చి: యుపి సిఎం మాయావతి

By Srinivas

Published: Tuesday, September 6, 2011, 15:08 [IST]

లక్నో: వికీలీక్స్ అధినేత జులియన్ అసాంజ్‌కు పిచ్చి పట్టి ఉంటుందని ఉత్తర ప్రదేశ్ ముఖ్యమంత్రి కుమారి మాయావతి మంగళవారం ఆరోపించారు. ఆయనకు పిచ్చి పట్టిందని వెంటనే పిచ్చాసుపత్రిలో చేర్పించాలన్నారు. తాను తన చెప్పుల కోసం ఎలాంటి ప్రత్యేక విమానాన్ని లక్నో నుండి ముంబయికి పంపించలేదన్నారు. అవన్నీ అవాస్తవాలన్నారు. వికీలీక్స్ వార్తలను ఖండిస్తున్నట్లు చెప్పారు. అసాంజే దళిత వ్యతిరేకని ఆరోపించారు. తాను దళిత బహుజనుల శ్రేయస్సు కోసం కట్టుబడి ఉన్నానన్నారు.

కాగా సోమవారం వికీలీక్స్ మాయావతిపై ఓ కేబుల్ బయట పెట్టిన విషయం తెలిసిందే. మాయావతి తాను వాడే కంపెనీ చెప్పుల కోసం ఓ ప్రత్యేక జెట్ విమానాన్ని లక్నో నుండి ముంబయి పంపించారని ఆ కేబుల్‌లో ఆరోపించింది. మాయవతికి తొమ్మిది మంది వంట వాళ్లని చెప్పింది. ఇద్దరు వంట వాళ్లు కాగా మిగిలిన వాళ్లు చేసిన వంటను గమనించడానికి. మరో ఇద్దరు ప్రత్యేకంగా చేసిన వంట రుచి చూడటానికి ఉంటారని కేబుల్ తెలిపింది. మాయావతి ఫ్యూడల్ మనస్తత్వం, ఆమె రాజకీయ లక్ష్యాల గురించి 2007-2009 మధ్య కాలంలో అమెరికాకు ఇక్కడి దౌత్యవేత్తలు పంపిన కేబుళ్లను వికీలీక్స్ బహిర్గతం చేసింది. అంతేకాదు ఆమె అహంకారి, చపలచిత్తురాలని ఆ కేబుళ్లో ఉంది.

Published On September 6, 2011