దీక్షపై కెసిఆర్ పట్టుదల, త్వరలో ప్రకటన: కెటిఆర్

By Pratap

Published: Saturday, September 24, 2011, 15:54 [IST]

హైదరాబాద్: తెలంగాణ రాష్ట్ర సాధన కోసం నిరవధిక నిరాహార దీక్ష చేపట్టాలని తమ పార్టీ అధ్యక్షుడు కె. చంద్రశేఖర రావు పట్టుదలగా ఉన్నారని తెలంగాణ రాష్ట్ర సమితి (తెరాస) శాసనసభ్యుడు కెటి రామారావు చెప్పారు. హైదరాబాదులోని మౌలాలి రైల్వే స్టేషన్ వద్ద రైల్ రోకో కార్యక్రమంలో పాల్గొన్న ఆయన శనివారం మీడియా ప్రతినిధులతో మాట్లాడారు. కెసిఆర్ దీక్షపై దసరా, దీపావళి పండుగల మధ్యన ఓ ప్రకటన వస్తుందని ఆయన చెప్పారు. కాంగ్రెసు, తెలుగుదేశం శాసనసభ్యులపై ఆయన తీవ్రంగా విరుచుకుపడ్డారు.

బువ్వ కావాలి, పార్టీ కావాలి, పదవులు కావాలి, తెలంగాణ కావాలని తెలుగుదేశం, కాంగ్రెసు ప్రజాప్రతినిధులు అనుకుంటున్నారని, అది సాధ్యం కాదని ఆయన అన్నారు. తెలంగాణ బువ్వ కావాలో, ముఖ్యమంత్రి కిరణ్ కుమార్ రెడ్డి, తెలుగుదేశం పార్టీ అధ్యక్షుడు నారా చంద్రబాబు నాయుడు విసిరే ఎంగిలి మెతుకులు కావాలో వారు తేల్చుకోవాలని ఆయన అన్నారు. ప్రజల పక్షాన ఉంటారో, పార్టీల పక్షాన ఉంటారో తేల్చుకోవాలని ఆయన సవాల్ చేశారు. ఆంధ్రోళ్ల చంకన చేరి తాము కూడా తెలంగాణ కోసం పోరాడుతున్నామంటే ప్రజలు నమ్మబోరని ఆయన అన్నారు. సకల జనుల సమ్మె అవూర్వంగా సాగుతోందని ఆయన అన్నారు.

Published On September 24, 2011