రెండు నెలల్లో తెలంగాణలో పర్యటిస్తా: చంద్రబాబు

By Pratap

Published: Saturday, October 1, 2011, 15:08 [IST]

హైదరాబాద్: రెండు నెలల్లో తెలంగాణలో పర్యటిస్తానని తెలుగుదేశం పార్టీ అధ్యక్షుడు నారా చంద్రబాబునాయుడు అన్నారు. తెలంగాణలో పర్యటించాలని తెలుగుదేశం తెలంగాణ నాయకులు చంద్రబాబును కోరారు. అందుకు సమాధానంగా - తాను తెలంగాణలో పర్యటిస్తానని ఆయన చెప్పారు. తెలుగుదేశం తెలంగాణ నాయకులు శనివారం చంద్రబాబుతో సమావేశమయ్యారు. సీమాంధ్రలో పర్యటన పూర్తి చేసుకుని, రెండు నెలల తర్వాత తెలంగాణలో పర్యటిస్తానని ఆయన అన్నారు. పార్టీ శాసనసభ్యులు నియోజకవర్గాల్లో పర్యటించడం లేదనే ఉద్దేశంతో ఆయన తాను తెలంగాణలో పర్యటిస్తానని అన్నట్లు తెలుస్తోంది.

రాజకీయాల్లో ఉన్నప్పుడు పూలూ రాళ్లూ పడుతాయని, రాళ్లే పడుతున్నాయని భయపడవద్దని ఆయన అన్నారు. తెలంగాణలో పార్టీ క్యాడర్ బలంగా ఉందని, నాయకులు భయపడాల్సిన అవసరం లేదని ఆయన అన్నారు. గ్రామాల్లో పార్టీ సీనియర్ నాయకులు పర్యటించాలని ఆయన సూచించారు. రాజీనామాలు చేసిన తర్వాత కూడా తమపై దాడులు జరుగుతున్నాయని పార్టీ తెలంగాణ నాయకులు చంద్రబాబుకు ఫిర్యాదు చేసినప్పుడు చంద్రబాబు ఆ విధంగా వ్యాఖ్యానించినట్లు తెలుస్తోంది.

Published On October 1, 2011