రాజీనామా చేసిన మంత్రి కోమటిరెడ్డి వెంకటరెడ్డి

By Pratap

Published: Saturday, October 1, 2011, 17:21 [IST]

హైదరాబాద్: మంత్రి పదవికి, శాసనసభా సభ్యత్వానికి కోమటిరెడ్డి వెంకటరెడ్డి రాజీనామా చేశారు. తెలంగాణ అంశంపై ఆయన రాజీనామా చేశారు. ఈ అంశంపై రాజీనామా చేసిన రెండో మంత్రి కోమటిరెడ్డి వెంకటరెడ్డి. ఇంతకు మహబూబ్ నగర్ జిల్లాకు చెందిన జూపల్లి కృష్ణారావు రాజీనామా చేశారు. గవర్నర్ ఆయన రాజీనామాను ఆమోదించారు. తన రాజీనామా లేఖను కోమటిరెడ్డి వెంకటరెడ్డి శనివారం సాయంత్రం గవర్నర్ నరసింహన్‌కు అందజేశారు. తన రాజీనామాను వెంటనే ఆమోదించాలని ఆయన గవర్నర్‌ను కోరారు. నల్లగొండ జిల్లాకు చెందిన కోమటిరెడ్డి వెంకటరెడ్డి వెంట భువనగిరి పార్లమెంటు సభ్యుడు కోమటిరెడ్డి రాజగోపాల్ రెడ్డి, శాసనసభ్యుడు చిరుమర్తి లింగయ్య, మాజీ పార్లమెంటు సభ్యుడు ఇంద్రకరణ్ రెడ్డి ఉన్నారు.

కాగా, తన శాసనసభా సభ్యత్వానికి కూడా కోమటిరెడ్డి వెంకటరెడ్డి రాజీనామా చేశారు. రాజీనామా లేఖను ఆయన శానససభా సచివాలయం కార్యదర్శికి అందజేశారు. ఆయన రేపు ఆదివారం లక్ష మందితో నల్లగొండలో తెలంగాణ కోసం నిరాహార దీక్ష చేయనున్నారు. తెలంగాణపై కాంగ్రెసు పార్టీ అధిష్టానం సాధ్యమైనంత త్వరగా తేల్చాలని, తెలంగాణకు అనుకూలంగా నిర్ణయం తీసుకోవాలని ఆయన కోరారు. ఇక తాను తెలంగాణ ఉద్యమంలో కీలక పాత్ర పోషిస్తానని ఆయన రాజీనామా లేఖను గవర్నర్‌కు సమర్పించడానికి ముందు అన్నారు.

Published On October 1, 2011