రాజీనామాలపై శాసనసభ నాగం టీమ్ హల్‌చల్

By Pratap

Published: Saturday, October 1, 2011, 15:51 [IST]

హైదరాబాద్: తెలంగాణ నగారా నేత నాగం జనార్దన్ రెడ్డి బృందం శనివారం శాసనసభలో హంగామా చేశారు. తమ రాజీనామాలు ఆమోదించాలని డిమాండ్ చేస్తూ నాగం జనార్దన్ రెడ్డి, వేణుగోపాలాచారి, జోగు రామన్న, హరీశ్వర్ రెడ్డి హంగామా చేశారు. వారు నలుగురు డిప్యూటీ స్పీకర్ ఛాంబర్‌లోకి వెళ్లి లోపలి నుంచి గడియ వేసుకున్నారు. తామ రాజీనామాలను ఆమోదించే వరకు కదిలేది లేదని వారు భీష్మిస్తున్నారు. మీడియాను అటు వైపు పోలీసులు అనుమతించడం లేదు. నాగం బృందం తమ వెంట దుస్తులు కూడా తెచ్చుకున్నారు. తమ రాజీనామాలను ఆమోదించాలని ఇప్పటికి చాలా సార్లు వారు స్పీకర్ నాదెండ్ల మనోహర్‌ను కోరారు. కానీ వాటిని ఆయన ఆమోదించడం లేదు.

స్పీకర్ తమ రాజీనామాలను ఆమోదించకపోవడాన్ని నాగం జనార్దన్ రెడ్డి తప్పు పట్టారు. రాజీనామాలు ఆమోదించకపోవడం తమ హక్కులను కాలరాయడమేనని ఆయన అన్నారు. మొదటి సారి రాజీనామా చేసిన 101 మంది శాసనసభ్యులు వచ్చి రాజీనామాలను ఆమోదింపజేసుకోవాలని ఆయన డిమాండ్ చేశారు. హైదరాబాదు వారి తాతముత్తాలదని సీమాంధ్ర నాయకులు అంటున్నారని, సీమాంధ్రకు రాజధాని కూడా లేదని, ఈ శాసనసభను వారు కట్టారా అని ఆయన అన్నారు. తెంలగాణపై ఒత్తిడి తేవాల్సిన సమయం ఇదేనని, ఢిల్లీకి వెళ్లిన నాయకులు అప్రమత్తంగా వ్యవహరించాలని ఆయన అంతకు ముందు అన్నారు.

Published On October 1, 2011