కెసిఆర్, కోదండరామ్‌లను సపోర్టు చేసిన శంకర రావు

By Pratap

Published: Friday, October 7, 2011, 17:08 [IST]

హైదరాబాద్: తనదైన శైలిలో వ్యాఖ్యలు చేసి సంచలన సృష్టించే మంత్రి శంకరరావు శుక్రవారం మరో సంచలన వ్యాఖ్య చేశారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావుకు, తెలంగాణ రాజకీయ జెఎసి చైర్మన్ కోదండరామ్‌కు మద్దతుగా నిలిచారు. ఆ ఇద్దరు నేతలను విమర్శించిన తమ కాంగ్రెసు పార్టీ నాయకుడు పాలడుగు వెంకట్రావుపై ఆయన శుక్రవారం మీడియా ప్రతినిధుల సమావేశంలో మండిపడ్డారు. రెచ్చగొట్టే విధంగా మాట్లాడవద్దని ఆయన పాలడుగు వెంకట్రావుకు సూచించారు. తెలంగాణ రాష్ట్ర సాధన కోసం జరుగుతున్న సకల జనుల సమ్మె ప్రపంచంలోనే అద్భుత ఘట్టమని ఆయన అన్నారు. తెలంగాణ ప్రత్యేక రాష్ట్రవాదానికి ఇతర అంశాలకు పోలిక లేదని ఆయన అన్నారు.

తెలంగాణ కోసం యువకులు ఆత్మహత్యలు చేసుకోవద్దని ఆయన విజ్ఞప్తి చేశారు. తెలంగాణకు సంబంధించిన కేంద్రం నుంచి సానుకూల సంకేతాలు వస్తున్నాయని ఆయన చెప్పారు. తెలంగాణ ఏర్పాటు డిమాండును వ్యతిరేకించే విషయంలో సీమాంధ్రులు వెనక్కి తగ్గుతున్నారని ఆయన అన్నారు. తెలంగాణ సమస్యను సాధ్యమైనంత త్వరగా పరిష్కరించాలని సీమాంధ్ర నాయకులు కూడా కోరుతున్నారని ఆయన అన్నారు.

Published On October 7, 2011