ఆపరేషన్ దుర్యోధనలాగా గన్‌డౌన్ చేస్తాం: చలపతి రావు

By Pratap

Published: Friday, October 14, 2011, 19:13 [IST]

హైదరాబాద్: పోలీసు డైరెక్టర్ జనరల్ (డిజిపి) దినేష్ రెడ్డిపై తెలంగాణ నాయకులు చేస్తున్న విమర్శలపై ఆంధ్రప్రదేశ్ పోలీసు ఆఫీసర్ల సంఘం అధ్యక్షుడు చలపతిరావు తీవ్రంగా మండిపడ్డారు. డిజిపిపై ఇలాంటి ఆరోపణలు మరోసారి చేస్తే తాము ఆపరేషన్ దుర్యోధన సినిమాలో మాదిరిగా గన్‌డౌన్ చేయాల్సి వస్తుందని ఆయన శుక్రవారం మీడియా ప్రతినిధుల సమావేశంలో హెచ్చరించారు. తాము గన్‌డౌన్ చేస్తే రాజకీయ నాయకులు రోడ్లపై తిరగలేరని ఆయన అన్నారు. తమపై అవమానకరమైన వ్యాఖ్యలు చేయవద్దని ఆయన రాజకీయ నాయకులకు సూచించారు. పోలీసు ఆఫీసర్ల సంఘం సమావేశానంతరం ఆయన మీడియా ప్రతినిధులతో మాట్లాడారు.

రాజకీయ నాయకులు వైఖరి మార్చుకోవాలని ఆయన అన్నారు. పోలీసులకు కుల, మత, రాజకీయ తేడాలు లేవని ఆయన అన్నారు. ఏ ప్రభుత్వం అధికారంలో ఉన్నా తాము సక్రమంగా తమ విధులు నిర్వహిస్తామని ఆయన అన్నారు. రైల్ రోకో నేపథ్యంలో రైళ్లను అడ్డుకుంటే చట్టప్రకారం చర్యలు తీసుకుంటామని డిజిపి దినేష్ రెడ్డి అన్నారు. దీనిపై తెలంగాణ రాజకీయ నాయకులు తీవ్రంగా మండిపడ్డారు.

Published On October 14, 2011