విద్యాసంస్థల ఇష్యులో నేనే గెలిచా: మందకృష్ణ మాదిగ

హైదరాబాద్: విద్యాసంస్థల వ్యవహారం విషయంలో తాను విజయం సాధించానని మాదిగ రిజర్వేషన్ పోరాట సమితి (ఎమ్మార్పీయస్) నేత మందకృష్ణ మాదిగ అన్నారు. విద్యాసంస్థలను సమ్మె నుంచి మినహాయించాలని డిమాండ్ చేస్తూ చేసిన తన ఆందోళన విజయం సాధించిందని ఆయన మంగళవారం మీడియా ప్రతినిదులతో అన్నారు. హైదరాబాదులోని ఉస్మానియా విశ్వవిద్యాలయం ఆవరణలో ఆయన మీడియాతో మాట్లాడారు. విద్యార్థుల భవిష్యత్తు నాశనం చేయవద్దని, అందుకే విద్యాసంస్థలను తెరవాలని తాము ఆందోళనకు దిగామని ఆయన అన్నారు.

తెలంగాణ వచ్చేవరకు సమ్మె చేస్తామని చెప్పిన తెలంగాణ ఉద్యోగ సంఘాల్లో కొన్ని ఎందుకు సమ్మెను విరమించాయో చెప్పాలని ఆయన డిమాండ్ చేశారు. తెలంగాణకు ముఖ్యమంత్రి కిరణ్ కుమార్ రెడ్డి వ్యతిరేకి అని ఆరోపిస్తూనే ముఖ్యమంత్రితో చర్చలు జరపడంలోని ఆంతర్యమేమిటని ఆయన అడిగారు. సమ్మె కాలానికి కూడా ఉద్యోగ సంఘాలు వేతనాలు అడగడం అవమానకరమని ఆయన అన్నారు. తాను 48 గంటల పాటు తలపెట్టిన దీక్షను ఉపసంహరించుకున్నట్లు ఆయన తెలిపారు.

English summary

MRPS leader Mandakrishna Madiga said that he is succeeded in his agitation.