విస్తరణ రాష్ట్రపతి పాలనకు దారి తీస్తుంది: శంకర్రావు

By Srinivas

Published: Wednesday, January 18, 2012, 14:19 [IST]

హైదరాబాద్: మంత్రివర్గ విస్తరణ రాష్ట్రపతి పాలనకు దారి తీసే అవకాశముందని చేనేత, జౌళి శాఖ మంత్రి శంకర రావు బుధవారం అనుమానం వ్యక్తం చేశారు. కిరణ్ కుమార్ రెడ్డి మంత్రివర్గం నుండి శంకర రావును తప్పిస్తారనే ప్రచారం జరుగుతున్న నేపథ్యంలో ఆయన బుధవారం మీడియాతో మాట్లాడారు. ఈ సందర్భంగా ఆయన మాట్లాడారు. విస్తరణ జరిగితే రాష్ట్రపతి పాలనకు దారి తీసే అవకాశముందన్నారు. తనకు పదవి ఉన్నా లేకపోయినా అవినీతిపై తన పోరాటం ఆగదన్నారు. పదవి లేకపోయినా అధిష్టానానికి విధేయుడిగా ఉంటానని చెప్పారు. అవినీతి, అధికార దుర్వినియోగాల మీద నిరంతర పోరాటం చేస్తానని స్పష్టం చేశారు. ఎనభై శాతం మంది ఎస్సీ, ఎస్టీ, బిసిలు ఉన్నారని వారికి న్యాయం చేయాలన్నారు.

వచ్చే ఐదు రాష్ట్రాల ఎన్నికల్లో కాంగ్రెసు గెలుపొందటం ఖాయమని, భవిష్యత్తులో ఏఐసిసి ప్రధాన కార్యదర్శి రాహుల్ గాంధీ ప్రధాని కావడం ఖాయమన్నారు. తెలంగాణపై పార్టీ ఆలస్యం చేస్తే పార్టీ ఇబ్బందుల పాలవుతుందన్నారు. పార్టీలో సామాజిక న్యాయం లేకుండా పోతుందని ఆవేదన వ్యక్తం చేశారు. తనను తొలగిస్తే స్వాగతించడానికి సిద్ధంగా ఉన్నానని చెప్పారు. ఎప్పుడూ సీమాంధ్ర నుండే ముఖ్యమంత్రి అవుతారని, తెలంగాణకు చెందిన బలహీనవర్గాలను ముఖ్యమంత్రి చేయాలని ఆయన డిమాండ్ చేశారు.

Published On January 18, 2012