రామచంద్రయ్యకు విద్యుత్, గంటకు కమర్షియల్ ట్యాక్స్?

హైదరాబాద్: నూతనంగా రాజ్‌భవన్‌లో మంత్రులుగా ప్రమాణ స్వీకారం చేసిన తిరుపతి శాసనసభ్యుడు చిరంజీవి వర్గం నేతలు సి.రామచంద్రయ్య(సిఆర్), గంటా శ్రీనివాస రావులకు గురువారం శాఖలు కేటాయించినట్లుగా తెలుస్తోంది. రామచంద్రయ్యకు విద్యుత్ శాఖ, గంటకు కమర్షియల్ ట్యాక్స్ శాఖలు కేటాయించనున్నారని సమాచారం. అయితే ఇంకా అధికారికంగా తెలియరాలేదు. సిఆర్‌కు వ్యవసాయం, గంటకు ఓడరేవులు, మౌలిక సదుపాయల శాఖ ఇచ్చేందుకు ముఖ్యమంత్రి సుముఖత వ్యక్తం చేసినప్పటికీ, ప్రాధాన్యత కల్గిన శాఖలు ఇవ్వాలని వారు పట్టుబట్టినట్లుగా సమాచారం. దీంతో వారికి విద్యుత్, వాణిజ్య శాఖలు కట్టబెట్టనున్నారని తెలుస్తోంది. అయితే కేటాయింపుల ప్రక్రియ మాత్రం ఇంకా పూర్తి కాలేదు. మంత్రివర్గంలోకి తీసుకున్నందుకు మర్యాదపూర్వకంగా చిరంజీవి, గంటా, సిఆర్ కిరణ్‌ను కలవనున్నారు.

కాగా తమ వర్గానికి మంత్రి పదవులు దక్కడంతో చిరంజీవి వర్గంలో ఉత్సాహం కనిపిస్తోంది. కాగా రామచంద్రయ్య గతంలో టిడిపి హయాంలోనూ మంత్రిగా పని చేశారు. ఆ తర్వాత చిరంజీవి పార్టీ పెట్టాక పిఆర్పీలో చేరారు. గంటా శ్రీనివాస రావు 1999లో టిడిపి ద్వారా రాజకీయాల్లోకి అడుగు పెట్టారు. ప్రజారాజ్యం పార్టీ కార్యాలయంలో చిరంజీవి తన వర్గం ఎమ్మెల్యేలు, నేతలతో భేటీ అయ్యారు. ఈ సందర్భంగా చిరంజీవి సిఆర్, గంటాలను సన్మానించారు.

English summary

Chiranjeevi camp mla Ganta Srinivas Rao get commercial tax in Kiran Kumar Reddy cabinet.