కూల్చితే ఊరుకోం: బాబుకు కొండా సురేఖ హెచ్చరిక

By Srinivas

Published: Thursday, January 19, 2012, 16:23 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడుపై వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గం కాంగ్రెసు శాసనసభ్యురాలు, మాజీ మంత్రి కొండా సురేఖ గురువారం మండిపడ్డారు. రాష్ట్రాన్ని తొమ్మిదేళ్లు పాలించిన చంద్రబాబు ఆయన స్థాయి నుండి దిగజారి దివంగత ముఖ్యమంత్రి వైయస్ రాజశేఖర రెడ్డి విగ్రహాలు కూల్చుతామని చెప్పడం బాధాకరమన్నారు. ఒక్క వైయస్ విగ్రహాన్ని కూల్చినా తాము ఊరుకునేది లేదన్నారు. చంద్రబాబు వ్యాఖ్యల పైన కాంగ్రెసు నేతలను సమాధానం చెప్పాలని డిమాండ్ చేశారు. టిడిపి వ్యవస్థాపకులు స్వర్గీయ ఎన్టీఆర్‌పై బాబుది కపట ప్రేమ అన్నారు. గతంలో ఎన్టీఆర్ ఫోటోను కొన్నాళ్లు ఎందుకు పెట్టుకోలేదో సమాధానం చెప్పాలన్నారు.

దళిత మంత్రి ఐన శంకర రావును మంత్రివర్గం నుండి తొలగించడం సరికాదన్నారు. శంకర రావు మంత్రులపై చేసిన పిటిషన్‌లపై విచారణ జరిపించుకొని తాము అవినీతిపరులం కాదని నిరూపించుకోవాలని సవాల్ చేశారు. వైయస్ఆర్‌ను అవినీతిపరుడు అన్నప్పుడు అదే శంకర రావును ప్రోత్సహించారన్నారు. మంత్రివర్గ అవినీతి బయటకు రాకుండా ఉండేందుకే ఆయనను తప్పిస్తున్నారన్నారు. అనర్హత పిటిషన్‌లపై తాము పదే పదే స్పీకర్‌కు వివరణ ఇవ్వాల్సిన అవసరం లేదన్నారు. స్పీకర్ తమపై వెంటనే చర్యలు తీసుకోవాలన్నారు. పోలవరం టెండర్ల కోసమే రాజం కేంద్ర మంత్రి గులాం నబీ ఆజాద్‌ను కలిశారని ఆమె అనుమానం వ్యక్తం చేశారు. విద్యార్థులపై ప్రభుత్వం పెట్టిన కేసులు వెంటనే ఎత్తి వేయాలని డిమాండ్ చేశారు. తెలంగాణపై కాంగ్రెస్ స్పష్టమైన ప్రకటన చేయాలన్నారు.

Published On January 19, 2012