బాలయ్య, జూ ఎన్టీఆర్ ఇద్దరూ సమానమే: అంబికా కృష్ణ

By Pratap

Published: Saturday, January 21, 2012, 12:35 [IST]

హైదరాబాద్: తెలుగుదేశం పార్టీకి బాలకృష్ణ, జూనియర్ ఎన్టీఆర్ ఇద్దరూ సమానమేనని పార్టీ వాణిజ్య విభాగం అధ్యక్షుడు అంబికా కృష్ణ అన్నారు. తెలుగుదేశం పార్టీ వాణిజ్య విభాగం అధ్యక్షుడిగా అంబికా కృష్ణ శనివారం పదవీ బాధ్యతలు స్వీకరించారు. పార్టీకి ఒక్కరు దగ్గర, మరొకరు దూరం అనేది ఏమీ లేదని, బాలకృష్ణ, జూనియర్ ఎన్టీఆర్ ఇద్దరూ సమానమేనని ఆయన మీడియా ప్రతినిధులతో అన్నారు. ఎవరికి ఏ బాధ్యతలు అప్పగించాలనే విషయంపై పార్టీ అధ్యక్షుడు నారా చంద్రబాబు నాయుడు, పార్టీ పోలిట్ బ్యూరో సభ్యులు నిర్ణయం తీసుకుంటారని ఆయన చెప్పారు. బాలకృష్ణ ఎక్కడి నుంచి పోటీ చేయాలనేది కూడా వారి నిర్ణయం మీదనే ఆధారపడి ఉంటుందని ఆయన చెప్పారు.

బాలకృష్ణ ఎక్కడి నుంచి పోటీ చేసినా విజయం సాధిస్తారని ఆయన దీమా వ్యక్తం చేశారు. తమిళనాడు, ఆంధ్రప్రదేశ్ రాష్ట్రాల సరిహద్దుల్లో పోటీ చేసినా బాలకృష్ణ గెలుస్తారని ఆయన చెప్పారు. పార్టీకి బాలకృష్ణ పూర్తి స్థాయిలో సేవలందించడానికి ముందుకు రావడం వల్ల పార్టీకి ప్రయోజనం చేకూరుతుందని, పార్టీ మరింత బలోపేతం అవుతుందని ఆయన అన్నారు. పన్నులు, వడ్డీలతో వ్యాపారులు ఇబ్బందులు పడుతున్నారని ఆయన అన్నారు. వ్యాపారుల సమస్యల పరిష్కారానికి తాము కృషి చేస్తామని ఆయన చెప్పారు.

Published On January 21, 2012