పెళ్లికి హాజరై సిబిఐకి పట్టుబడిన సునీల్ రెడ్డి?

By Pratap

Published: Wednesday, January 25, 2012, 11:55 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్ ప్రధాన అనుచరుడు సునీల్ రెడ్డి ఓ పెళ్లికి హాజరు కావడం వల్లనే సిబిఐకి పట్టుబడినట్లు చెబుతున్నారు. ఎమ్మార్ ప్రాపర్టీస్ కేసులో కోనేరు ప్రసాద్‌ను అరెస్టు చేసి, విచారణను సిబిఐ వేగవంతం చేసిన తర్వాత సునీల్ రెడ్డి అజ్ఞాతంలోకి వెళ్లినట్లు చెబుతున్నారు. కోనేరు ప్రసాద్ ద్వారా తనకు సంబంధించిన సమాచారం సిబిఐకి తెలిసే అవకాశాలున్నాయని భావించిన సునీల్ రెడ్డి అజ్ఞాతంలోకి వెళ్లినట్లు చెబుతారు. అయితే, ఓ పెళ్లికి ఇటీవల హాజరైన సునీల్ రెడ్డి విషయాన్ని కొంత మంది సిబిఐకి చేరవేసినట్లు, తద్వారా అతను సిబిఐకి చేతికి చిక్కినట్లు వార్తలు వచ్చాయి.

సునీల్ రెడ్డి వ్యాపారంపై కూడా సిబిఐ అధికారులు అనుమానాలు వ్యక్తం చేస్తున్నట్లు సమాచారం. సునీల్ రెడ్డి గృహ అలంకరణ దుకాణాన్ని నిర్వహిస్తున్నాడు. ఆ దుకాణంపై సిబిఐ ఓ కన్ను వేసి ఉంచినట్లు తెలుస్తోంది. అలంకరణ వస్తువుల దిగుమతుల ముసుగులో జగన్‌కు సంబంధించిన నిధులను విదేశాలకు తరలించారా అనే అనుమానాలు వ్యక్తమవుతున్నట్లు తెలుస్తోంది. ఈ కోణంలోనూ సిబిఐ దర్యాప్తు సాగుతున్నట్లు తెలుస్తోంది.

సునీల్ రెడ్డి అరెస్టు వైయస్ జగన్‌ను తీవ్రంగానే కలత పెట్టినట్లు అర్థమవుతోంది. వైయస్సార్ కాంగ్రెసు పార్టీ నాయకులు, కార్యకర్తలు మంగళవారం సాయంత్రం దిల్‌కుషా అతిథిగృహం వద్ద ఆందోళనకు దిగారు. సునీల్ రెడ్డికి నైతిక మద్దతు తెలపడానికి వచ్చామని, దీనిపై సిబిఐ అధికారులతో మాట్లాడుతామని వారు చెప్పారు. వారిని కలవడానికి సిబిఐ అధికారులు నిరాకరించారు. దీంతో వారు ఆందోళనకు దిగారు. వారిని పోలీసులు చెదరగొట్టారు.

Published On January 25, 2012