ఓట్లకోసం కెసిఆర్ కాళ్లమీద పడ్డాడు:నాగంపై మోత్కుపల్లి

By Srinivas

Published: Thursday, January 26, 2012, 14:49 [IST]

హైదరాబాద్: ఓట్ల కోసం తెలంగాణ నగారా సమితి అధ్యక్షుడు, మాజీ మంత్రి నాగం జనార్ధన్ రెడ్డి తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు కాళ్లపై పడ్డాడని తెలుగుదేశం పార్టీ సీనియర్ శాసనసభ్యుడు మోత్కుపల్లి నర్సింహులు గురువారం ధ్వజమెత్తారు. తెలంగాణ కోసం కాకుండా ఓట్ల కోసం కెసిఆర్‌ను కలవడం నాగం దిగజారుడుతనానికి నిదర్శనమన్నారు. ఆయన కెసిఆర్‌ను తనకు మద్దతివ్వాలని కోరారు కానీ తెలంగాణ సాధన కోసం కాదన్నారు. కేవలం ఓట్ల కోసం మాత్రమే కలవడం ఎంత వరకు సమంజసమన్నారు. నాగం తీరుకు ఆయన నియోజకవర్గం ప్రజలే ఆయనకు ఉప ఎన్నికల్లో బుద్ధి చెబుతారన్నారు.

కె చంద్రశేఖర రావును గతంలో పలుమార్లు తెలంగాణ ద్రోహిగా వర్ణించిన నాగం ఇప్పుడు ఎలా కలిసి మద్దతు కోరారన్నారు. కెసిఆర్ చేసిన తప్పులను ఇప్పుడు ఎందుకు ప్రశ్నించడం లేదన్నారు. కాగా బుధవారం నాగం టిఆర్ఎస్ చీఫ్ కెసిఆర్‌ను కలిసిన విషయం తెలిసిందే. త్వరలో జరగనున్న ఉప ఎన్నికల్లో మద్దతు కోసమే ఆయన కలిసినట్లుగా వార్తలు వచ్చాయి.

Published On January 26, 2012