ఎసిబి వైఖరి వల్లే అనుమానాలు: మోపిదేవి

By Pratap

Published: Tuesday, February 21, 2012, 19:42 [IST]

హైదరాబాద్: మద్యం సిండికేట్ల వ్యవహారంలో ఎసిబి వైఖరి వల్లే తనపై అనుమానాలు కలుగుతున్నాయని, ఎసిబి వైఖరిని ఖండిస్తున్నానని ఆబ్కారీ మంత్రి మోపిదేవి వెంకటరమణ అన్నారు. తనకు ముడుపులు ఇచ్చినట్లు మద్యం సిండికేట్ల కింగ్ పిన్ నున్న రమణ చెప్పినట్లు మరోసారి వార్తలు రావడంతో ఆయన మంగళవారం సాయంత్రం ముఖ్యమంత్రి కిరణ్ కుమార్ రెడ్డిని కలిశారు. ఎసిబి వైఖరిపై తీవ్ర ఆగ్రహంతో ఉన్న ఆయన రాజీనామా చేస్తారనే వార్తలు వచ్చాయి. అయితే, ముఖ్యమంత్రితో మోపిదేవి భేటీ తర్వాత అటువంటిదేమీ లేనట్లు తేలింది. మద్యం సిండికేట్ల వ్యవహారంలో తన ప్రమేయం లేదని ముఖ్యమంత్రి నమ్ముతున్నట్లు ఆయన తెలిపారు.

మద్యం సిండికేట్ల వ్యవహారంతో తనకు సంబంధం లేకపోయినప్పటికీ తననే లక్ష్యంగా చేసుకున్నారని ఆయన ఆవేదన వ్యక్తం చేశారు. తనకు ఎవరిపైనా అనుమానాలు లేవని ఆయన అన్నారు. తాను ఎవరికీ పోటీదారును కానని ఆయన అన్నారు. ఎసిబి వైఖరి ఏకపక్షంగా ఉందని ఆయన విమర్సించారు. మద్యం సిండికేట్ల వ్యవహారంలో పదే పదే తన పేరు ఎందుకు ప్రస్తావనకు వస్తుందో తెలియడం లేదని ఆయన అన్నారు. మద్యం సిండికేట్ల వ్యవహారంలో తనకు సంబంధం లేదని ఆయన అన్నారు. మద్యం సిండికేట్ల వ్యవహారం ఎల్లుండి శాసనసభలో ప్రస్తావనకు వస్తుందని ఆయన చెప్పారు. తాను సమాధానం ఇస్తానని ఆయన చెప్పారు.

Published On February 21, 2012