దినేష్ త్రివేది అవుట్: రైల్వే మంత్రిగా ముకుల్ రాయ్

By Pratap

Published: Thursday, March 15, 2012, 16:54 [IST]

న్యూఢిల్లీ: రైల్వే బడ్జెట్ దెబ్బ దినేష్ త్రివేదిపై పడింది. మంత్రి పదవికి దినేష్ త్రివేది చేసిన రాజీనామాను ప్రధాని డాక్టర్ మన్మోహన్ సింగ్ ఆమోదించారు. ఆయన స్థానంలో తృణమూల్ కాంగ్రెసుకు చెందిన ముకుల్ రాయ్ రైల్వే మంత్రిగా రానున్నారు. కేంద్ర మంత్రిగా ముకుల్ రాయ్ ఈ నెల 17 లేదా 18వ తేదీన ప్రమాణ స్వీకారం చేసే అవకాశాలున్నాయి. రైల్వే చార్జీల పెంపుపై తీవ్ర ఆగ్రహం వ్యక్తం చేసిన తృణమూల్ కాంగ్రెసు అధినేత్రి, పశ్చిమ బెంగాల్ ముఖ్యమంత్రి మమతా బెనర్జీ రాజీనామా చేయాలని దినేష్ త్రివేదిని ఆదేశించారు. దీంతో వెంటనే ఆయన రాజీనామా చేశారు.

పెంచిన చార్జీలను తగ్గించడానికి దినేష్ త్రివేదీ నిరాకరించడంతో మమతా బెనర్జీ ప్రధాని డాక్టర్ మన్మోహన్ సింగ్‌కు లేఖ రాశారు. మమతా బెనర్జీ ఢిల్లీలోని కాంగ్రెసు నాయకత్వంతో కూడా మాట్లాడారు. త్రివేదిని మంత్రి పదవి నుంచి తప్పించాలని డిమాండ్ చేశారు. మమతా డిమాండ్‌ను కాంగ్రెసు నాయకత్వం వెంటనే అంగీకరించింది. మమతా నిర్ణయం అకస్మాత్తుగా యుపిఎ ప్రభుత్వాన్ని ఆసాధారణ రాజకీయ సంక్షోభంలోకి నెట్టింది. అయితే, తమ ప్రభుత్వానికి ఏ విధమైన ముప్పు లేదని కాంగ్రెసు వర్గాలు అంటున్నాయి. రైల్వే మంత్రి పదవిని చేపట్టనున్న ముకుల్ రాయ్ ఇప్పటికే ఢిల్లీకి చేరుకున్నాడు.

Published On March 15, 2012