పెళ్లి చేసుకున్న ఉత్తర కొరియా అధ్యక్షుడు కిమ్ జాంగ్

By Pratap

Published: Thursday, July 26, 2012, 11:17 [IST]

ప్యాంగ్‌యాంగ్‌ : ఉత్తర కొరియా అధ్యక్షుడు కిమ్‌ జాంగ్‌ ఉన్‌ వివాహం చేసుకున్నారు. ఆయన రి సోల్‌ జు అనే యువతిని వివాహం చేసుకున్నట్లు ప్రభుత్వ మీడియా ప్రకటించింది. అయితే దీనికి సంబంధించి పూర్తి వివరాలు మాత్రం ఇంకా వెల్లడించలేదు. భార్యాభర్తలిద్దరూ ప్యాంగ్‌యాంగ్‌ థీమ్‌ పార్క్‌ను సందర్శించారు.

కాగా రి సోల్‌ జు వివరాలు కూడా రహస్యంగానే ఉంచారు. ఆమెను మిస్టరీ ఉమెన్‌గా అమెరికాతో పాటు పలు అంతర్జాతీయ దేశాలంటున్నాయి. ఇటీవల జరిగే కార్యక్రమాలకు రి సోల్‌జును వెంటబెట్టుకుని రావడంపై ప్యాంగ్‌యాంగ్‌లో చెవులు కొరుక్కున్నారు. ఇదే పేరుతో ఓ మహిళా గాయని ఉన్నారని, అయితే ఆమె, ఈమె ఒక్కరేనా కాదా అన్నది సందేహాస్పదంగానే ఉంది.

ఉత్తరకొరియా అధ్యక్షుడి వివాహంపై అమెరికా స్పందించింది. పెళ్ళి జరగడం మంచి వార్త అంటూనే ప్రజల కష్టాలు తొలగించే చర్యలు చేపడితే మరింత మంచి వార్త అవుతుందని అమెరికా ప్రభుత్వ ప్రతినిధి విక్టోరియా వ్యాఖ్యానించారు. పెళ్ళికి తమకు ఆహ్వానం లేదని నవ్వుతూ అన్నారు.

ఆ యువ మహిళతో కిమ్ జాంగ్ మికీ మౌస్, డిస్నీ లాండ్ వంటి సంగీతోత్సవాల్లో పలు మార్లు కనిపించారు. ఇటీవల ఆ మహిళతో కిమ్ జాంగ్ పలు కార్యక్రమాల్లో దర్శనమిచ్చారు. దీంతో ఆమె ఆయన భార్య అయి ఉంటుందని మీడియా ఊహాగానాలు చేసింది.

Published On July 26, 2012