ఏఐఎస్ఎఫ్ ఆందోళన: ఎమ్మెల్యే చంద్రావతి అరెస్ట్

By Srinivas

Published: Friday, August 17, 2012, 15:07 [IST]

హైదరాబాద్: సాంఘీక సంక్షేమ హాస్టళ్ల సమస్యల పరిష్కారం, మెస్ ఛార్జీల పెంపును కోరుతూ ఏఐఎస్ఎఫ్ ఆధ్వర్యంలో శుక్రవారం హైదరాబాదులోని ఇందిరా పార్క్ వద్ద ధర్నా నిర్వహించారు. ఈ ఆందోళన ఉద్రిక్తతకు దారి తీసింది. విద్యార్థుల మెస్ ఛార్జీలు పెంచాలని విద్యార్థులు ఈ సందర్భంగా డిమాండ్ చేశారు. హాస్టళ్లలో ఉన్న సమస్యలను ప్రభుత్వం పరిష్కరించంపై శ్రద్ధ చూపించడం లేదని ఆరోపించారు. అధికారులు హాస్టళ్లలో నిద్రించడం కాదని, సమస్యలను పరిష్కరించాలన్నారు.

ధర్నా అనంతరం పెద్ద ఎత్తున తరలి వచ్చిన విద్యార్థులు సచివాలయాన్ని ముట్టడించేందుకు బయలుదేరారు. ఈ ధర్నాలో సిపిఎం భద్రాచలం ఎమ్మెల్యే చంద్రావతి కూడా పాల్గొన్నారు. ఆమె ఆధ్వర్యంలో విద్యార్థులు సచివాలయ ముట్టడికి బయలుదేరారు. పోలీసులు వారిని మార్గమధ్యలోనే అడ్డుకున్నారు. పోలీసులకు, విద్యార్థులకు మధ్య తీవ్ర వాగ్వాదం జరిగింది. ఆ తర్వాత ఇరువర్గాల మధ్య తోపులాట జరిగింది. దీంతో అక్కడ పరిస్థితి ఉద్రిక్తంగా మారింది.

విద్యార్థులు ఎట్టి పరిస్థితుల్లో సచివాలయాన్ని ముట్టడించాలనే లక్ష్యంతో ముందుకు వెళుతుండటంతో వారిని పోలీసులు అడ్డుకొని అరెస్టు చేశారు. ఎమ్మెల్యే చంద్రావతిని కూడా పోలీసులు అరెస్టు చేశారు. ఈ సమయంలో పోలీసులతో విద్యార్థులు వాగ్వాదానికి దిగారు. పోలీసులు డౌన్ డౌన్, ప్రభుత్వం డౌన్ డౌన్ అంటూ నినాదాలు చేశారు.

Published On August 17, 2012