బాబు ఇలాకాలో టిడిపి: సొంతూళ్లో మేకపాటికి దెబ్బ

By Pratap

Published: Tuesday, July 23, 2013, 19:29 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు తన సొంత పంచాయతీలో తడాఖా చూపారు. కందులవారిపల్లెలో తెలుగుదేశం పార్టీ మద్దతుదారు విజయం సాధించారు. ఈ పంచాయతీ పరిధిలోనే చంద్రబాబు సొంతూరు నారావారిపల్లె ఉంది. ఈ పంచాయతీలో కాంగ్రెసు, వైయస్సార్ కాంగ్రెసు పార్టీలో ధరావతు కోల్పోయారు.

వైయస్సార్ కాంగ్రెసు పార్టీ పార్లమెంటు సభ్యుడు మేకపాటి రాజమోహన్ రెడ్డికి పంచాయతీ ఎన్నికల్లో ఎదురుదెబ్బ తగిలింది. నెల్లూరు జిల్లాలోని ఆయన సొంతూరు బ్రాహ్మణపల్లిలో వైయస్సార్ కాంగ్రెసు పార్టీ అభ్యర్థి ఘోర పరాజయం పాలయ్యారు. ఈ ఓటమికి వైయస్సార్ కాంగ్రెసు పార్టీ నాయకులు బిత్తరపోతున్నారు.

చెదురుమొదురు సంఘటనలు

రాష్ట్రవ్యాప్తంగా జరుగుతున్న తొలిదశ పంచాయతీ ఎన్నికల్లో పలు చోట్ల చెదురుమొదురు ఘటనలు మినహా పోలింగ్ ప్రశాతంగా కొనసాగిందని ఎన్నికల కమిషన్ ప్రధాన కార్యదర్శి నవీన్ మిట్టల్ తెలిపారు. అనంతపురం జిల్లా ముదిగుబ్బ మండలం కొడవటగట్టుపల్లిలో అభ్యర్థులు ఎక్కువగా, గుర్తులు తక్కువగా ఉన్నట్లు ఫిర్యాదు వచ్చిందని, వీటిపై జిల్లా కలెక్టర్ల నివేదిక తర్వాత పోలింగ్ నిర్వహిస్తామని నవీన్‌మిట్టల్ తెలిపారు.

బ్యాలెట్ బాక్సులో ఇంక్

తిరుపతినగరంలోని వేదాంతపురంలో ఉద్రిక్తత నెలకొంది. పంచాయతీ ఎన్నికల పోలింగ్‌లో దొంగ ఓట్లు వస్తున్నారంటూ ఓ మహిళ బ్యాలెట్ బ్యాక్స్‌లో ఇంక్ పోసింది. పోలింగ్ కేంద్రం ఎదుట గ్రామస్థులు ఆందోళనకు దిగారు. వెంటనే అధికారులు బ్యాలెట్ బాక్స్‌ను పరిశీలించి, అంతా సరిగా ఉందని తేల్చారు. కాసేపటి తర్వాత తిరిగి పోలింగ్ ప్రారంభమైంది.

కర్నూలు జిల్లాలోని నందాయల మండలం కత్తెచర్లపల్లి పంచాయతీ ఎన్నికలో ఉద్రిక్తత నెలకొంది. పోలింగ్ కేంద్రం వద్ద ఎన్నికల ప్రచారం చేస్తున్న వైయస్సార్ కాంగ్రెసు పార్టీ కార్యకర్తలపై కాంగ్రెస్ వర్గీయులు కత్తులతో దాడి చేశారు. ఈ ఘటనలో ఐదుగురు వ్యక్తులు తీవ్రంగా గాయపడగా, వారిలో ఇద్దరి పరిస్థితి విషమంగా ఉంది.

పనిచేయని వెబ్‌కామ్‌లు

నెల్లూరు జిల్లాలో పంచాయతీ ఎన్నికల సందర్భంగా పోలింగ్ కేంద్రాల్లో ఏర్పాటు చేసి వెబ్‌కామ్‌లు పనిచేయకపోవడంతో బీఎస్ఎన్ఎల్ అధికారులపై జాయింట్ కలెక్టర్ ఆగ్రహం వ్యక్తం చేశారు. మరోవైపు జలదంకి మండలం చికకాకలో ఇరు వర్గాల మధ్య ఘర్షణ నెలకొనడంతో పోలీసులు వారి చెదరగొట్టారు. అటు బ్రాహ్మణకాకలో ఇరు వర్గాల మధ్య ఘర్షణ చెలరేగింది.

పశ్చిమ గోదావరి జిల్లాలోని చింతలపూడి హైస్కూల్ పోలింగ్ బూత్‌లో ఓ వికలాంగుడి పట్ల జాయింట్ కలెక్టర్ దురుసుగా ప్రవర్తించారు. ఓటేసేందుకు వచ్చి ఓ వికలాంగుడిని జేసీ బాబురావునాయుడు చొక్కాపట్టుకుని బయటకు నెట్టాశాడు. దీనిపై స్థానికులు ఆగ్రహం వ్యక్తం చేస్తున్నారు.

Published On July 23, 2013