Ramgopal Varma: వర్మకు హైకోర్టు బిగ్ రిలీఫ్-ప్రభుత్వానికి నోటీసులు..!

గత వైసీపీ ప్రభుత్వ హయాంలో వైఎస్ జగన్ పై తీసిన వ్యూహం చిత్రం ప్రమోషన్ లో భాగంగా విపక్ష నేతలుగా ఉన్న చంద్రబాబు, పవన్ కళ్యాణ్, నారా లోకేష్ పై అనుచిత పోస్టులు పెట్టిన విషయంలో టాలీవుడ్ దర్శకుడు రాంగోపాల్ వర్మకు ఇవాళ తాత్కాలిక ఊరట లభించింది.

తనను అరెస్టు చేసేందుకు ఏపీ పోలీసులు ప్రయత్నిస్తున్న నేపథ్యంలో ఆయన దాఖలు చేసిన పిటిషన్ పై విచారణ జరిపిన హైకోర్టు.. వచ్చే వారం వరకూ అరెస్టు కాకుండా ఉత్తర్వులు ఇచ్చింది.

వర్మ సోషల్ మీడియా పోస్టులపై ప్రకాశం జిల్లా మద్దిపాడుతో పాటు ఇతర ప్రాంతాల్లో కేసులు నమోదైన నేపథ్యంలో ఆయన తనను అరెస్టు చేయకుండా ఉత్తర్వులు కోరుతూ హైకోర్టును ఆశ్రయించారు. అయితే హైకోర్టు మాత్రం అరెస్టు చేయకుండా ఉత్తర్వులు ఇవ్వలేమని, కావాలంటే ముందస్తు బెయిల్ పిటిషన్ వేసుకోవాలని సూచించింది. దీంతో ఆయన ముందస్తు బెయిల్ పిటిషన్ వేయడంతో పాటు ఈ కేసులన్నీ కొట్టేయాలని క్వాష్ పిటిషన్ కూడా వేశారు.

ఈ పిటిషన్లపై ఇవాళ హైకోర్టులో విచారణ జరిగింది. ఇందులో ముందస్తు బెయిల్ పిటిషన్ పై విచారణ మాత్రం వచ్చే సోమవారానికి వాయిదా పడింది. అప్పటివరకు వర్మపై ఎటువంటి చర్యలు తీసుకోవద్దంటూ కోర్టు ఆదేశాలు ఇచ్చింది. ఆర్జీవీ దాఖలు చేసిన క్వాష్ పిటిషన్ పై కౌంటర్ దాఖలు చేయాలని ప్రభుత్వానికి హైకోర్టు ఆదేశాలు ఇచ్చింది. ఈనెల 9లోగా కౌంటర్ దాఖలకు ప్రభుత్వానికి సమయం ఇచ్చింది. ప్రభుత్వం దాఖలు చేసే కౌంటర్ ఆధారంగా వచ్చే సోమవారం వర్మ అరెస్టుతో పాటు బెయిల్ వ్యవహారం కూడా తేలనుంది.

English summary

In big relief to Tollywood director ramgopal varma, ap high court issued interim order to police not to arrest him till next Monday in social media posts case.