వైయస్ జగన్‌కు మరో షాక్: వైసిపికి బాజిరెడ్డి గుడ్‌బై?

By Pratap

Published: Monday, March 3, 2014, 19:28 [IST]

హైదరాబాద్: తెలంగాణ ప్రాంతంలో వైయస్ జగన్ నాయకత్వంలోని వైయస్సార్ కాంగ్రెసు పార్టీకి మరో ఎదురు దెబ్బ తగిలింది. వైయస్సార్ కాంగ్రెసు నేత బాజీరెడ్డి గోవర్ధన్‌రెడ్డి త్వరలో పార్టీని వీడినట్లు ప్రచారం జోరుగా జరుగుతోంది. ఆయన బిజెపిలో చేరనున్నట్లు తెలుస్తోంది.

ఆ మేరకు తన సన్నిహితులతో బాజిరెడ్డి చర్చలు జరుపుతున్నట్లు సమాచారం. వైయస్ రాజశేఖర రెడ్డి మీద ఉన్న అభిమానంతోనే ఇన్నాళ్లు వైయస్సార్ కాంగ్రెసు పార్టీలో కొనసాగినట్లు బాజిరెడ్డి గోవర్దన్ తన సన్నిహితులతో చెప్పినట్లు సమాచారం.

బిజెపి ముఖ్య నేతలతో కూడా బాజిరెడ్డి చర్చలు జరిపారని, ఇటీవల బిజెపి రాష్ట్ర అధ్యక్షుడు కిషన్‌రెడ్డిని కూడా కలుసుకుని తన సీటు ఖరారు చేసుకున్నట్లు తెలియవచ్చింది. ఈ నేపథ్యంలోనే ఆయన వైయస్సార్ కాంగ్రెసు పార్టీకి రాజీనామా చేసి, లేఖను ఫ్యాక్స్ ద్వారా పార్టీ కార్యాలయానికి పంపినట్లుగా సమాచారం.

బాజిరెడ్డి పార్టీని వీడడం లాంఛనమేనని అంటున్నారు. తెలంగాణకు జగన్ అన్యాయం చేశారని, ఆయన సమైక్య నినాదం అందుకున్నారని, తెలంగాణలో వైయస్సార్ కాంగ్రెసు పార్టీకి స్థానం లేదని బాజిరెడ్డి తన సన్నిహితులతో అన్నట్లు సమాచారం. ప్రస్తుతం బెంగళూరులో ఉన్న బాజిరెడ్డి తిరిగి వచ్చిన తరువాత తన నిర్ణయాన్ని ప్రకటించే అవకాశం ఉంది.

Published On March 3, 2014