ఏపీలో పలు చోట్ల సంపూర్ణ చంద్రగ్రహణం: తెరుచుకున్న తిరుమల ఆలయం

అమరావతి: దేశంలోని పలు రాష్ట్రాలతోపాటు ఆంధ్రప్రదేశ్‌లోనూ మంగళవారం పాక్షిక చంద్రగ్రహణం కనిపించింది. చంద్రగ్రహణంను ప్రజలు ఎంతో ఆసక్తిగా తిలకించారు. మంగళవారం మధ్యాహ్నం 2.39 గంటలకు చంద్రగ్రహణం ప్రారంభమై సాయంత్రం 6.27 నిమిషాలకు ముగిసింది.

మంగళవారం సాయంత్రం 5.12 గంటల ప్రాంతంలో చంద్రగ్రహణం పూర్తిగా కనిపించింది. చీకటి పడేసరికి పాక్షిక గ్రహణంతో చంద్రుడు కనువిందు చేశాడు. రాష్ట్రంలోని కొన్ని నగరాల్లో గ్రహణం సంపూర్ణంగా కనిపించగా.. తిరుమలలో మాత్రం పాక్షికంగానే దర్శనమిచ్చింది.

చంద్ర గ్రహణం వీక్షించేందుకు ఎలాంటి పరికరాలు అవసరం లేదని చెప్పడంతో ప్రజలంతా నేరుగా చంద్ర గ్రహణాన్ని తిలకించారు. మరోవైపు, చంద్రగ్రహణం కారణంగా మూతబడిన ఆలయాలు తెరుచుకుంటున్నాయి. పలు ఆలయాలు భక్తులను అనుమతిస్తుండగా.. మరికొన్ని ఆలయాల్లో బుధవారం నుంచి అనుమతిస్తామని చెప్పారు.

ఇక చంద్రగ్రహణం కారణంగా 11 గంటలపాటు మూసివేసిన తిరుమల శ్రీవారి ఆలయం తలుపులను గ్రహణం అనంతరం తెరిచారు. సంప్రోక్షణ పూర్తి చేసిన తర్వాత.. రాత్రి 8 గంటల నుంచి సర్వదర్శనానికి భక్తులకు అనుమతి ఇచ్చారు.

తెలంగాణలోనూ పాక్షికంగా చంద్రగ్రహణం

ప్రపంచ వ్యాప్తంగా మంగళవారం ఏర్పడిన సంపూర్ణ చంద్రగ్రహణం పలు దేశాల్లో కనువిందు చేసింది. అయితే, తెలంగాణలో చంద్ర గ్రహణం పాక్షికంగానే కనిపించింది. చంద్ర గ్రహణాన్ని ప్రజలు ఆసక్తిగా తిలకించారు.

హైదరాబాద్ నగరంలో సాయంత్ర 2.39 గంటలకు చంద్రగ్రహణం ప్రారంభం కాగా, సాయంత్రం 5.12 గంటలకు పూర్తిగా కనిపించింది. చీకటి పడటంతో పాక్షిక చంద్రగ్రహణమే కనిపించింది.పలు ప్రాంతాల్లో ప్రత్యేక ఏర్పాట్లతో ప్రజలు చంద్రుడిని వీక్షించారు. చంద్ర గ్రహణం 6.19 గంటలకు చంద్ర గ్రహణం పూర్తిగా ముగిసింది.

హైదరాబాద్ తోపాటు తెలంగాణ వ్యాప్తంగా ప్రజలు చంద్ర గ్రహణాన్ని ఆసక్తిగా తిలకించారు. గ్రహణాన్ని చూడటానికి ప్రత్యేక పరికరాలు అవసరం లేదని నిపుణులు సూచించడంతో.. ప్రజలందరూ చంద్ర గ్రహణాన్ని తిలకించారు. పలువురు బిర్లా ప్లానిటేరియంలో చంద్ర గ్రహణం వీక్షించారు.

పాక్షిక చంద్ర గ్రహణాన్ని పలువురు తమ కెమెరాలు, ఫోన్లలో బంధించారు. చంద్ర గ్రహణం దృష్ట్యా రాష్ట్రంలోని అన్ని ఆలయాలు మూతపడ్డాయి. గ్రహణ కాలం ముగిసిన తర్వాత ఆలయాల్లో శుద్ధి, సంప్రోక్షణ చేశారు. బుధవారం ఉదయం నుంచి భక్తులను అనుమతించనున్నారు.

English summary

Full Lunar eclipse in andhra pradesh: Tirumala temple opened for devotees darshan.