చంద్రబాబు, పవన్ ను ఫిక్స్ చేస్తున్న జోగయ్య..!!

మరోసారి హరిరామ జోగయ్య తెర మీదకు వచ్చారు. ఎన్నికల ముందు పవన్ కు వరుస లేఖలతో జోగయ్య పలు డిమాండ్లు చేసారు. పవన్ తీసుకున్న 21 సీట్ల పైన ఆగ్రహం వ్యక్తం చేసారు. ఇప్పుడు కూటమి అధికారంలోకి వచ్చిన తరువాత జోగయ్య మళ్లీ లేఖలు మొదలు పెట్టారు. ఈ సారి సీఎం చంద్రబాబు..పవన్ కు కలిసి లేఖ రాసారు. కాపు రిజర్వేషన్ అంశాన్ని ప్రస్తావిస్తూ హరిరామ జోగయ్య రాసిన లేఖ రాజకీయంగా సంచలనంగా మారుతోంది.

జోగయ్య లేఖతో
హరిరామ జోగయ్య మరోసారి కాపు రిజర్వేషన్ పైన లేఖ రాసారు. కాపులకు విద్య, ఉద్యోగాలలో రిజర్వేషన్ కల్పించాలని కోరుతూ ముఖ్యమంత్రి చంద్రబాబుకు ఉప ముఖ్యమంత్రి పవన్ కళ్యాణ్‌కు కాపు బలిజ సంక్షేమ సేన అధ్యక్షుడు చేగొండి హరి రామ జోగయ్య లేఖ రాశారు. కాపులకు విద్య, ఉద్యోగాలలో రిజర్వేషన్ కల్పించాలని బ్రిటీష్ కాలం నుంచి డిమాండ్ చేస్తున్నామని లేఖలో పేర్కొన్నారు. ఈడబ్ల్యూఎస్ 10 శాతం కోటాలో కాపులకు 5 శాతం రిజర్వేషన్ కల్పిస్తూ గతంలో టీడీపీ ప్రభుత్వం ఆమోదించిందన్నారు.

కాపు రిజర్వేషన్లపై
వైసీపీ ప్రభుత్వంలో జగన్ కాపుల రిజర్వేషన్ అమలు చేయకుండా నిలిపివేశారన్నారు. కాపులకు రిజర్వేషన్ వ్యవహారం కేంద్ర ప్రభుత్వం చేతిలో ఉండంటూ మాజీ ముఖ్యమంత్రి జగన్ ప్రకటన చేశారని తెలిపారు. తమ సామాజిక వర్గానికి రిజర్వేషన్ కల్పించాలంటూ కాపు సంక్షేమ సేన అనేక ఉద్యమాలు చేసిందని హరిరామ జోగయ్య తెలిపారు. ఈడబ్ల్యూఎస్ కోటాలో కాపులకు 5 శాతం రిజర్వేషన్ కల్పించాలని కోరుతూ కాపు సంక్షేమ సేన రాష్ట్ర న్యాయస్థానంలో పిటిషన్ సైతం వేసిందన్నారు.

సీఎం, డిప్యూటీ స్పందిస్తారా
కాపులకు రిజర్వేషన్ కల్పించడానికి వైసీపీ ప్రభుత్వం విముఖత తెలుపుతూ న్యాయ స్థానంలో పిటిషన్ దాఖలు చేసిందన్నారు. నూతనంగా ఏర్పడిన ప్రభుత్వం కాపు రిజర్వేషన్ పై సానుకూలంగా స్పందిస్తూ న్యాయస్థానంలో కొత్త ఆఫిడివిట్ దాఖలు చేయాలని కోరుతున్నామని హరిరామ జోగయ్య తెలిపారు. త్వరలో కాపు రిజర్వేషన్ పై ముఖ్యమంత్రి చంద్రబాబు, ఉప ముఖ్యమంత్రి పవన్ కళ్యాణ్ లు సానుకూల నిర్ణయం తీసుకుంటారని ఆశాభావం వ్యక్తం చేస్తున్నామని అన్నారు.

English summary

Hari Rama Jogaiah letter to Chandra Babu and Pawan goes viral