పిఠాపురం మహిళలకు పవన్ మరో గిఫ్ట్..! అన్నయ్య పుట్టినరోజున..!

ఏపీలో తొలిసారి తనను ఎమ్మెల్యేగా గెలిపించిన పిఠాపురం ప్రజల రుణం తీర్చుకునేందుకు ఏ చిన్న అవకాశం దొరికినా డిప్యూటీ సీఎం పవన్ కళ్యాణ్ వదులుకోవడం లేదు. ఇప్పటికే పిఠాపురం అభివృద్ధితో పాటు సంక్షేమం విషయంలో తన పరపతిని ఉపయోగించి పలు కార్యక్రమాలు చేపడుతున్న పవన్ కళ్యాణ్.. పండుగలకూ అక్కడి మహిళలకు కానుకలు అందిస్తూనే ఉన్నారు. ఇదే క్రమంలో మరోసారి ఆయన పిఠాపురం మహిళలకు శ్రావణ శుక్రవారం కానుక అందించబోతున్నారు.

పవన్ కళ్యాణ్ ఆదేశాల మేరకు శ్రావణ మాసంలోని చివరి శుక్రవారం శ్రీ పాదగయ క్షేత్రంలోని ఉమా కుక్కుటేశ్వరస్వామి, పురుహూతిక అమ్మవారి ఆలయంలో పిఠాపురం ఆడపడుచులకు సామూహిక వరలక్ష్మీ వ్రతాలకు భారీ ఏర్పాట్లు చేస్తున్నారు. ఈ నెల 22వ తేదీ ఉదయం 5 గంటల నుంచి ఈ వరలక్ష్మీ వ్రతాలు ప్రారంభమవుతాయి. మొత్తం 5 విడతలుగా వరలక్ష్మీ వ్రతాలు నిర్వహించనున్నారు.

ఈ నేపథ్యంలో పవన్ కళ్యాణ్ సూచన మేరకు ఒక్కో బ్యాచ్ కు ఒక్కో అమ్మవారి పేరునా అంబిక, భ్రమరాంబ, చాముండి, దుర్గ, ఈశ్వరి అని నామకరణం చేశారు. అంబిక భక్త బృందం ఉదయం 5 గంటల నుంచి 6.30 గంటల వరకు, భ్రమరాంబ భక్త బృందం 6.30 గంటల నుంచి 8 గంటలు వరకు, చాముండి భక్త బృందం 8 గంటల నుంచి 9.30 గంటల వరకు, దుర్గ భక్త బృందం 9.30 నుంచి 11 గంటల వరకు, ఈశ్వరి భక్త బృందం 11 నుంచి 12.30 గంటల వరకు వరలక్ష్మీ వత్రం నిర్వహిస్తారు.

మధ్యాహ్నం 1 గంట తరువాత వచ్చే ఆడపడుచులకు కూడా పవన్ కళ్యాణ్ పంపించిన పసుపు, కుంకుమ, చీరలను కానుకగా అందిస్తారు. మొత్తం 10 వేల మంది ఆడపడుచులకు చీరల పంపిణీకి ఏర్పాట్లు జరుగుతున్నాయి. దీనికి సంబంధించిన కూపన్ల పంపిణీ రేపు ప్రారంభమవుతుంది. కూపన్ల మీద సమయం కూడా ముద్రిస్తున్నారు. ఆ సమయం బట్టి వత్రానికి ఏర్పాట్లు చేసుకోవాలని మహిళలకు సూచించారు. వాతావరణం అనుకూలిస్తే ఒకే విడతలో వెయ్యి నుంచి 1500 మంది వరకు వరలక్ష్మీ వత్రం చేసుకునేందుకు ఏర్పాట్లు చేశారు. చీరలను దేవాలయ సిబ్బంది, పోలీసులు, జనసేన వాలంటీర్లు పంపిణీ చేస్తారు.