బాబు ఝలక్: పొట్లూరికి పవన్‌కళ్యాణ్ నచ్చ చెబుతారా?

హైదరాబాద్: తాను కోరుకున్న విజయవాడ పార్లమెంటు స్థానం దక్కక పోవడంతో ప్రముఖ పారిశ్రామికవేత్త పొట్లూరి వర ప్రసాద్ బుధవారం జనసేన పార్టీ అధ్యక్షులు పవన్ కళ్యాణ్‌‍ను కలవనున్నారు. విజయవాడ సీటు కోసం పవన్ ద్వారా టిడిపి అధ్యక్షులు నారా చంద్రబాబు నాయుడు పైన ఒత్తిడి తెచ్చారు. అయితే, బాబు చివరకు కేశినేని నాని వైపే మొగ్గారు.

ఈ నేపథ్యంలో ఆయన పవన్‌తో భేటీ కానున్నారు. తాను బుధవారం పవన్ కళ్యాణ్‍‌ను కలుస్తున్నానని చెప్పారు. ఆ తర్వాత భవిష్యత్తు కార్యాచరణ చెబుతానని అన్నారు. పొట్లూరి పైన ఆరోపణలు ఉన్నందున చంద్రబాబు టిక్కెట్ నిరాకరించినట్లుగా తెలుస్తోంది.

కాగా, పివిపి పోటీ.. ఆయనకు పవన్ కళ్యాణ్ మద్దతుపై విమర్శలు వ్యక్తమవుతున్న నేపథ్యంలో.. పివిపి పోటీ చేయడంలో తప్పేమీ లేదని పవన్ బహిరంగ ప్రకటనలు చేశారు.

ఈ నేపథ్యంలోనే, పవన్‌ను కలుసుకుని తన పోటీ విషయంపై పివిపి చర్చించనున్నట్లు తెలిసింది. పవన్‌తో సమావేశమై ఆయన సలహా మేరకే నడుచుకుంటానని పివిపి తెలిపారు. అయితే, పొట్లూరి పోటీ చేయకపోవచ్చని, పవన్ ఆయనకు నచ్చచెబుతారని ఆయన సన్నిహిత వర్గాలు చెబుతున్నాయి.

English summary

Potluri Vara Prasad to meet Power Star Pawan Kalyan on Wednesday.