‘బాబు వచ్చినా.. జాబ్ రాలేదు’: చంద్రబాబుపై ఆర్ కృష్ణయ్య సంచలనం
హైదరాబాద్: తెలుగుదేశం పార్టీ ఎమ్మెల్యే, బీసీ సంక్షేమ సంఘం జాతీయ అధ్యక్షుడు ఆర్ కృష్ణయ్య టిడిపి అధినేత, ఆంధ్రప్రదేశ్ ముఖ్యమంత్రి చంద్రబాబునాయుడుపై సంచలన వ్యాఖ్యలు చేశారు. ఏపీలో 'బాబు వస్తే..జాబు వస్తుందని' ప్రచారం చేసుకుని టీడీపీ అధికారంలోకి వచ్చి రెండేళ్లు గడుస్తున్నా నిరుద్యోగులకు ఉద్యోగాలు దక్కలేదని అన్నారు.
ఏపీపీఎస్సీ ప్రకటించనున్న గ్రూప్-1 సర్వీసుల్లో గ్రూప్-2 సర్వీస్లను విలీనం చేయరాదని డిమాండ్ చేస్తూ మంగళవారం నిరుద్యోగులు పబ్లిక్ సర్వీస్ కమిషన్ కార్యాలయాన్ని ముట్టడించారు. వారికి మద్దతుగా ఎమ్మెల్యే కృష్ణయ్య మట్లాడారు.
గ్రూప్-1 సర్వీస్లో గ్రూప్-2 సర్వీసులను విలీనం చేయడం అశాస్త్రీయమన్నారు. .ఇంటర్వూల పేరుతో లక్షలు దండుకునేందుకే అధికారులు కుట్రలు పన్నుతున్నారన్నారు. ఎన్నికల సమయంలో ఇచ్చిన హామీ మేరకు రాష్ట్రంలో ఖాళీగా ఉన్న ఒక 1.45 లక్షల ఉద్యోగాలను భర్తీ చేయాలని డిమాండ్ చేశారు.
డిప్యూటీ సర్వేయర్ ఉద్యోగాల ప్రశ్నాపత్రం ఇంగ్లీషుతో పాటుగా తెలుగులో కూడా ఇవ్వాలని డిమాండ్ చేశారు. కాగా, శ్రీనివాస్ గౌడ్ మాట్లాడుతూ... నిరుద్యోగులకు అన్యాయం జరిగితే సహించేది లేదని, చంద్రబాబైనా... చంద్రశేఖరైనా నిలదీస్తామన్నారు.
అనంతరం ఏపీపీఎస్సీ చైర్మన్ ఉదయ్ భాస్కర్తో కృష్ణయ్య నేతృత్వంలోని ప్రతినిధి బృందం చర్చలు జరిపింది. సమస్యపై ప్రభుత్వానికి నివేదిక ఇస్తామని ఛైర్మన్ హామీ ఇచ్చినట్లు కృష్ణయ్య తెలిపారు. ఈ కార్యక్రమంలో గుజ్జ కృష్ణ, నీల వెంకటేష్, పులకచర్ల శ్రీనివాస్, రాంబాబు తదితరులు పాల్గొన్నారు.
Click it and Unblock the Notifications
Sign in with Google