'మీరే అంతమవుతారు, మొరగడం ఆపండి, పెట్రోలు లేకుండా తగలబెడతా'

'వంగవీటి' సినిమా పైన రామ్ గోపాల్ వర్మ - వంగవీటి రాధాకృష్ణ, రంగా అభిమానుల మధ్య మాటల యుద్ధం కొనసాగుతోంది. తాజాగా, సోమవారం నాడు వంగవీటి రంగా, రాధా మిత్రమండలి వర్మ మాటల పైన స్పందించింది.

Updated: Monday, December 26, 2016, 21:43 [IST]

విజయవాడ: 'వంగవీటి' సినిమా పైన రామ్ గోపాల్ వర్మ - వంగవీటి రాధాకృష్ణ, రంగా అభిమానుల మధ్య మాటల యుద్ధం కొనసాగుతోంది. తాజాగా, సోమవారం నాడు వంగవీటి రంగా, రాధా మిత్రమండలి వర్మ మాటల పైన స్పందించింది.

రామ్ గోపాల్ వర్మ సవాల్‌ను తాము స్వీకరిస్తున్నామని చెప్పారు. దమ్ముంటే వర్మ బహిరంగ చర్చకు రావాలని డిమాండ్ చేశారు. బెజవాడలో ప్రతి పేద కుటుంబంతో వంగవీటి మోహన రంగకు అనుబంధం ఉందని చెప్పారు.

నా అంతు చూసేలోపు మీరే అంతమవుతారు: వర్మ కౌంటర్

తనకు హెచ్చరికలు, సవాళ్లు విసిరిన రాధారంగా మిత్రమండలికి దర్శకులు రామ్ గోపాల్ వర్మ తీవ్రంగా మండిపడ్డారు. నా అంతు చూస్తానని చెబుతున్నారని, నా అంతు చూసే లోపు మీరే అంతమవుతారని తీవ్రంగా మండిపడ్డారు.

మీరు మొరగటం ఆపకపోతే మీరేమిటో ప్రజలకు తెలిసిపోతుందన్నారు. పని పాటా లేకుంటా మురికివాడల్లో తిరిగే మీలాంటి వారు వంగవీటి రంగా, వంగవీటి రాధాకృష్ణ పేరు చెడగొట్టేందుకే పుట్టారన్నారు.

మీలాంటి వాళ్లు నా దిష్టిబొమ్మలు తగలబెట్టవచ్చు కానీ మీలోని కుళ్లును పెట్రోలు లేకుండా తగలబెడతానని అన్నారు. నేను క్షమాపణలు చెప్పడం అటుంచి, మీరు మొరగటం ఆపేయాలన్నారు. ఇప్పటికైనా బుద్ధిలేని మీ బుర్రల్లోకి బుద్ధిని ఎక్కించుకోండన్నారు. అలాగే, వంగవీటి రాధా బెదిరింపులకు భయపడేది లేదని, ఇక్కడ ఎవరూ గాజులు తొడుక్కొని కూర్చోలేదని వర్మ అన్నారు.