మహిళా నేత ఇంట్లో పెళ్లి: యువతులతో రికార్డింగ్ డ్యాన్స్, అరెస్ట్

విశాఖ: పెళ్లి వేడుకల్లో రికార్డింగ్ డ్యాన్స్ చేస్తున్నారన్న విషయం తెలుసుకున్న పోలీసులు ఇద్దరు డ్యాన్సర్లతో పాటు కార్యక్రమం ఏర్పాటు చేసిన ఓ సర్పంచ్ తనయుడిని అదుపులోకి తీసుకున్నారు. ఈ సంఘటన విశాఖపట్నం జిల్లా ఆనందపురం మండలం శోంఠ్యం గ్రామంలో జరిగింది.

బుధవారం అర్ధరాత్రి సమయంలో రికార్డింగ్ డ్యాన్సులు ఏర్పాటు చేశారు. టీడీపీకి చెందిన గ్రామ సర్పంచ్ చిన్న కుమారుడు పెళ్లి వేడుకల్లో భాగంగా.. పెద్ద కుమారుడు ఈ రికార్డింగ్ డ్యాన్సులు ఏర్పాటు చేశారని సమాచారం.

ఈ విషయం తెలుసుకున్న పోలీసులు సంఘటన స్థలానికి చేరుకున్నారు. ఇద్దరు డ్యాన్సర్లను అరెస్టు చేశారు. రికార్డింగ్ డ్యాన్స్ ఏర్పాటు చేసిన వారిని కూడా అదుపులోకి తీసుకున్నారు. డ్యాన్సర్లు అసభ్యంగా నృత్యాలు చేసినట్లుగా తెలుస్తోంది.

కిరాణా దుకాణాలపై పోలీసుల దాడులు

నిజామాబాద్‌ జిల్లాలోని మద్నూరులో కిరాణా దుకాణాలపై పోలీసులు దాడులు నిర్వహించారు. ఈ సందర్భంగా ఐదు గుట్కా, జర్దా సంచులను స్వాధీనం చేసుకుని నలుగురిపై కేసులు నమోదు చేశారు.

మహిళ మృతి

గుంటూరు జిల్లా వెల్దుర్తి మండలంలోని మిట్టమీదిపల్లిలో ప్రేమ విషయంలో ఇరువర్గాల మధ్య గొడవ జరిగింది. ఈ ఘటనలో ఓ మహిళ మృతి చెందారు. ఎల్లమ్మ అనే మహిళను ప్రత్యర్థులు గొడ్డళ్లతో నరికి చంపారు.

English summary

Recording dancers arrest in Vishakapatnam