చెన్నై నుంచి బెంగళూరు మీదుగా ఏపీకి ప్రత్యేక రైళ్లు

Special Trains: పండగ సీజన్ లో రైళ్లకు ప్రయాణికుల తాకిడి అధికంగా ఉంటుంది. వివిధ పుణ్యక్షేత్రాలు, పలు పర్యాటక ప్రాంతాలను సందర్శించడానికి, దూర ప్రాంతాలకు రాకపోకలు సాగించాలనుకునే వాళ్ల రద్దీ ఎక్కువగా కనిపిస్తుంటుందీ సీజన్‌లో. వాళ్లంతా కూడా రైళ్ల మీదే ఎక్కువగా ఆధారపడుతుంటారు. ఈ రద్దీని దృష్టిలో ఉంచుకుని రైల్వే అధికారులు పలు ప్రత్యేక రైళ్లను ప్రవేశపెట్టడం ఆనవాయితీగా వస్తోంది.

ఈ నెల 23వ తేదీన పుట్టపర్తి సత్యసాయిబాబా జయంతి. ఇది ఆయన శతజయంతి ఉత్సవాలు. ఇందులో పాల్గొనడానికి రెండు తెలుగు రాష్ట్రాల నుంచే కాకుండా తమిళనాడు, కర్ణాటక నుంచి పెద్ద సంఖ్యలో భక్తులు పుట్టపర్తికి చేరుకోనున్నారు. ఈ శత జయంతి వేడుకలను వైభవంగా నిర్వహించడానికి ప్రశాంతి నిలయం ప్రతినిధులు ఏర్పాట్లు పూర్తి చేస్తోన్నారు. సత్యసాయి సేవా సంస్థలు ఆ రోజున పలు ఆధ్యాత్మిక సమావేశాలు, సేవా కార్యక్రమాలను నిర్వహించనున్నాయి.

ఈ సందర్భంగా తమిళనాడుకు చెందిన భక్తులు పుట్టపర్తిని సందర్శించడానికి వీలుగా రైల్వే అధికారులు ప్రత్యేకంగా రెండు రైళ్లను ప్రవేశపెట్టనున్నారు. డాక్టర్ ఎంజీఆర్ చెన్నై సెంట్రల్ నుంచి ప్రశాంతి నిలయం మీదుగా గుంతకల్ వరకు ఈ రైళ్లు రాకపోకలు సాగించనున్నాయి. దీనికి సంబంధించిన టైమ్ టేబుల్ వివరాలను అధికారులు విడుదల చేశారు.

• ఈ నెల 19, 21 తేదీల్లో బుధ, శుక్రవారాల్లో రాత్రి 11:50 నిమిషాలకు డాక్టర్ ఎంజీఆర్ చెన్నై సెంట్రల్ నుంచి బయలుదేరే నంబర్ 06091 ప్రత్యేక రైలు మరుసటి రోజు మధ్యాహ్నం 2:15 నిమిషాలకు గుంతకల్ కు చేరుకుంటుంది.

• ఈ నెల 20, 22 తేదీల్లో అంటే గురు, శనివారాల్లో సాయంత్రం 5:30 నిమిషాలకు గుంతకల్ నుంచి బయలుదేరే నంబర్ 06092 ప్రత్యేక రైలు మరుసటి రోజు ఉదయం 9:45 నిమిషాలకు డాక్టర్ ఎంజీఆర్ చెన్నై సెంట్రల్ కు చేరుకుంటుంది.

• పెరంబూరు, తిరువళ్లూరు, అరక్కోణం జంక్షన్, కాట్పాడి జంక్షన్, జోలర్ పేట, కుప్పం, బంగారుపేట, వైట్ ఫీల్డ్, కృష్ణరాజపురం, యలహంక, హిందూపురం, శ్రీసత్యసాయి ప్రశాంతినిలయం, ధర్మవరం, అనంతపురం, గుత్తి మీదుగా ఈ రైళ్లు రాకపోకలు సాగిస్తాయి.

English summary

To clear the extra rush of passengers on the occasion, Railway authorities has notified the operation of special express trains between Dr. MGR Chennai Central and this station.