విజయవాడ, గుంటూరు వైసీపీ మేయర్ అభ్యర్థులు వీళ్లే: సెకెండ్ లిస్ట్ లో.. !!

Published: Saturday, October 17, 2026, 7:46 [IST]

ఏపీలో వివిధ మున్సిపల్ కార్పొరేషన్లు, మున్సిపాలిటీలు, నగర పంచాయతీలకు సంబంధించి మేయర్, ఛైర్మన్ అభ్యర్థుల మలి విడత జాబితాను వైఎస్ఆర్ కాంగ్రెస్ పార్టీ విడుదల చేసింది. ఈ జాబితాలో మొత్తం ఆరు మున్సిపల్ కార్పొరేషన్లు ఉన్నాయి. మున్సిపాలిటీలు- 10, నగర పంచాయతీలు- 7 చోట్ల పోటీ చేసే అభ్యర్థుల వివరాలను ఇందులో పొందుపరిచింది. స్థానిక సంస్థల ఎన్నికల్లో విజయం సాధించడమే లక్ష్యంగా వివిధ సామాజిక వర్గాలకు తగిన ప్రాతినిధ్యం కల్పిస్తూ అభ్యర్థుల ఎంపిక ప్రక్రియను పూర్తి చేస్తోంది.

రిజర్వేషన్ నిబంధనలకు అనుగుణంగా బీసీ, ఎస్సీ, ఎస్టీ సామాజిక వర్గాలు, మహిళలకు అధిక ప్రాధాన్యత ఇచ్చింది.. వైఎస్ఆర్సీపీ. స్థానికంగా ప్రజలతో మమేకమై పనిచేసే అనుభవం, ప్రజాదరణ కలిగిన నాయకులకే ఈ అవకాశాలు కల్పించినట్లు పార్టీ వర్గాలు వెల్లడించాయి. ఉత్తరాంధ్ర, కోస్తా, రాయలసీమ ప్రాంతాల్లోని అన్ని జిల్లాలను సమతుల్యం చేస్తూ అభ్యర్థులను ఎంపిక చేసింది. టీడీపీ కూటమికి ధీటుగా క్షేత్రస్థాయిలో పార్టీని మరింత బలోపేతం చేయడానికి, స్థానిక సంస్థల్లో సుపరిపాలన అందించడానికి వారు అనుభవం ఉపయోగపడుతుందని భావిస్తోంది.

YSRCP has released its 2nd candidate list for upcoming urban local body elections in Andhra Pradesh

కార్పొరేషన్ మేయర్ అభ్యర్థులు

ఊహించినట్టే విజయవాడ మున్సిపల్ కార్పొరేషన్ మేయర్ అభ్యర్థిగా రాయన భాగ్యలక్ష్మి (నగరాలు సామాజికవర్గం)కి మరోసారి అవకాశం లభించింది. గుంటూరు అభ్యర్థిగా తాడికొండ అలివేలు వెంకట నాగపద్మ శ్రీదేవి (వైశ్య) పేరు ఖరారైంది. తిరుపతి మేయర్ రేసులో వై వాసుదేవ యాదవ్ (బీసీ) నిలిచారు. కర్నూలు కార్పొరేషన్ అభ్యర్థిగా ఊతకళ్ల సుశీల (మాదిగ), అనంతపురం బరిలో చిట్లూరు రమేష్ గౌడ దిగారు. చిత్తూరు నుంచి రామస్వామి చంద్రశేఖర్ (వన్నెకుల క్షత్రియ) పోటీలో నిలిచారు.