Bengaluru: బెంగళూరులో అపరిచితుడు సీన్.. విద్యుదాఘాతంతో మహిళతో పాటు చిన్నారి మృతి..

మీరు అపరిచితుడు(Aparichitudu) సినిమా చూసే ఉంటారు.. అందులో విక్రమ్(Vikram) చిన్నతనంలో తన చెల్లి చనిపోతుంది. విద్యుత్ అధికారుల నిర్లక్ష్యంతో విద్యుత్ వైరు తెగి కింద పడుతుంది. అప్పుడే వర్షం కురుస్తుంది. దీంతో విక్రమ్ చెల్లి అటగా వెళ్లి విద్యుత్ ఘాతానికి గురి చనిపోతోంది. దీనిపై విక్రమ్ తండ్రి కోర్టుకు వెళ్లినా ఫలితం ఉండదు. దీంతో విక్రమ్ వింతగా మారి.. నిర్లక్ష్యం వహించిన అధికారులను చంపుతుంటాడు. అయితే అది సినిమా.. మరి నిజ జీవితంలో అలా జరుగుతుందా అంటే.. అవును జరిగింది.

బెంగళూరు(Bengaluru)లో రోడ్డు పక్కన ఫుట్ పాత్ పై ఉన్న విద్యుత్‌ వైరుపై ఓ మహిళ చూసుకోకుండా కాలు వేయడంతో విద్యుదాఘాతానికి గురై ఓ ఆమెతో పాటు తొమ్మిది నెలల పాప కన్నుమూశారు. బెంగళూరుకు చెందిన 23 ఏళ్ల సౌందర్య, ఆమె 9 నెలల కుమార్తె తమిళనాడు నుంచి బెంగళూరుకు తిరిగి వచ్చారు. ఫుట్ పాత్ పై నడుచుకుంటు వెళ్తున్న క్రమంలో ప్రమాదం చోటుచేసుకుంది. ఆదివారం ఉదయం 6 గంటలకు ఈ సంఘటన జరిగింది. ఈ ఘటన స్థానికంగా సంచలనం సృష్టించింది.

రోడ్డు పక్కన పడి ఉన్న లైవ్ వైర్ బెంగళూరు ఎలక్ట్రిసిటీ సప్లై కంపెనీ లిమిటెడ్ (బెస్కామ్)కి చెందినదని గుర్తించారు. సర్వీస్ ప్రొవైడర్‌పై కేసు నమోదు చేసినట్లు పోలీసులు తెలిపారు. దర్యాప్తు ప్రారంభించామని, సంబంధిత బెస్కామ్ అధికారులు, సిబ్బందిని విచారిస్తున్నామని డీసీపీ వైట్‌ఫీల్డ్ ఒక ప్రకటనలో తెలిపారు. చీకట్లో రోడ్డుపక్కన కరెంటు తీగ గుర్తుపట్టకుండా పడి ఉంది. ఘటన జరిగిన వెంటనే తల్లి, బిడ్డ మృతి చెందారని పేర్కొన్నారు.

గతేడాది సెప్టెంబరులో బెంగళూరులో వర్షాల కారణంగా నీరు నిలిచిన రోడ్డుపై జారిపడి విద్యుదాఘాతానికి గురై ఓ బాలిక మృతి చెందడంతో ఆమె కుటుంబ సభ్యులు బెస్కామ్‌పై ఫిర్యాదు చేశారు. అంతకుముందు ఏప్రిల్, 2022లో, బెంగళూరులో 22 ఏళ్ల వ్యక్తి కేబుల్ వైర్‌తో తాకడంతో విద్యుదాఘాతానికి గురయ్యాడు. ఈ ఘటన జరిగినప్పుడు ఆ వ్యక్తి తన సోదరుడితో కలిసి పార్కు సమీపంలోని ఫుట్ పాత్ పై నడుచుకుంటూ వెళ్తున్నాడు. సినిమాలో అయితే విక్రమ్ ఆ అధికారులను శిక్షించాడు. కానీ నిజజీవితంలో నిర్లక్ష్యం వహించిన అధికారులను ఎవరు శిక్షిస్తారు అంటూ నెటిజన్లు ఆగ్రహం వ్యక్తం చేస్తున్నారు.

English summary

In Bengaluru, a nine-month-old baby along with her got electrocuted when a woman accidentally stepped on an electric wire on the footpath on the roadside.