చర్యలు తీసుకోవద్దంటే రూ.10కోట్లు డిపాజిట్ చేయండి: ఐసీఐసీఐకి సుప్రీంకోర్టు షాక్

న్యూఢిల్లీ: ఐసీఐసీఐ బ్యాంకుకి సుప్రీంకోర్టులో షాక్ తగిలింది. నేషనల్ కన్జూమర్ కమిషన్‌లో రూ. 10కోట్లు డిపాజిట్ చేయాల్సిందిగా ఐసీఐసీఐ బ్యాంక్‌ను సుప్రీంకోర్టు ఆదేశించింది. ఐసీఐసీఐ బ్యాంక్ మేనేజర్ ఓ కో-ఆపరేటివ్ బ్యాంక్‌ను మోసం చేసిన కేసులో సుప్రీం ఈ తీర్పు చెప్పింది.

చర్యలు తీసుకోవద్దంటే..

కన్జూమర్ కమిషన్ ఆర్డర్‌పై స్టే విధించేందుకు జస్టిస్ మదన్ బీ లోకూర్ నేతృత్వంలోని ధర్మాసనం నిరాకరించింది. బ్యాంక్ ఆ మొత్తం డిపాజిట్ చేసిన తర్వాతే దానిని పరిశీలిస్తామని స్పష్టం చేసింది. బ్యాంక్‌పై ఎలాంటి తీవ్ర చర్యలు తీసుకోకుండా ఉండేందుకే ఈ డిపాజిట్ అని కూడా కోర్టు తేల్చి చెప్పింది.

అలా అయితేనే..

రెండు వారాల్లోగా ఈ డిపాజిట్ చేయాలని, అలా చేస్తే ఎలాంటి చర్యలు తీసుకోమని కోర్టు తన తీర్పులో స్పష్టం చేసింది. ఐసీఐసీఐ బ్యాంక్ తన సేవల్లో నిర్లక్ష్యం వహించిన కారణంగా ముంబై డిస్ట్రిక్ సెంట్రల్ కో-ఆపరేటివ్ బ్యాంక్‌కు వడ్డీ సహా రూ.10కోట్లు చెల్లించాలని ఈ ఏడాది మార్చిలో కన్జూమర్ కమిషన్ ఆదేశించింది.

నకిలీ పత్రాలో డబ్బు కాజేశాడు..

ఈ ఆదేశాలపై స్టే విధించాలంటూ ఐసీఐసీఐ సుప్రీంకోర్టుకు వెళ్లింది. గతంలో ఇదే కో-ఆపరేటివ్ బ్యాంక్ ఐసీఐసీఐలో ఫిక్స్‌డ్ డిపాజిట్ల రూపంలో డబ్బును పెట్టుబడిగా పెట్టింది. అయితే, సదరు బ్యాంక్ మేనేజర్ నకిలీ పత్రాలతో ఆ డబ్బును కాజేశాడు.

ఉద్యోగి తప్పు చేసినా.. బాధ్యత బ్యాంకుదే...

ఈ కేసులో కో-ఆపరేటివ్ బ్యాంక్ వినియోగదారుడు కాదు.. వాణిజ్య లాభాల కోసమే డిపాజిట్ చేసిందంటూ ఐసీఐసీఐ చేసిన వాదనను కన్జూమర్ కమిషన్ కొట్టేసింది. తమ ఉద్యోగులు చేసినా.. ఆ తప్పుకు బాధ్యత వహించి ఆ మొత్తం బ్యాంకే చెల్లించాలని స్పష్టం చేసింది.

English summary

The Supreme Court has directed ICICI Bank to deposit Rs 10 crore in the National Consumer Commission, which had directed ICICI to refund the money to a cooperative bank for fraud committed by its manager.