Gold: బంగారానికి చరిత్రాత్మక డిమాండ్, 5 వేల టన్నుల రికార్డ్

ప్రపంచవ్యాప్తంగా ఆర్థిక, భౌగోళిక రాజకీయ అనిశ్చితులు కొనసాగుతున్న వేళ బంగారం మరోసారి పెట్టుబడిదారుల నమ్మకాన్ని నిలబెట్టుకుంది. 2025 సంవత్సరంలో ప్రపంచ బంగారం డిమాండ్ తొలిసారిగా 5,000 టన్నుల మైలురాయిని దాటిందని వరల్డ్ గోల్డ్ కౌన్సిల్ (WGC) వెల్లడించింది. గత ఏడాది 4,961.9 టన్నులుగా ఉన్న మొత్తం డిమాండ్, ఈ ఏడాది 5,002 టన్నులకు చేరి ఆల్‌టైమ్ రికార్డును సృష్టించింది.

ఈ అసాధారణ వృద్ధికి ప్రధాన కారణం పెట్టుబడి డిమాండ్ విపరీతంగా పెరగడమేనని డబ్ల్యూజీసీ స్పష్టం చేసింది. సురక్షిత పెట్టుబడులపై ఆసక్తి పెరగడం, డాలర్ బలహీనత, స్టాక్ మార్కెట్లలో అధిక విలువలు, వడ్డీ రేట్లు తగ్గే అవకాశాల అంచనాలు బంగారంపై మదుపరులను ఆకర్షించాయి.

పెట్టుబడుల జోరు... 84 శాతం ఎగబాకిన డిమాండ్

2025లో పెట్టుబడి డిమాండ్ ఏకంగా 84 శాతం పెరిగి 2,175.3 టన్నులకు చేరింది. 2024లో ఇది 1,185.4 టన్నులుగా మాత్రమే ఉండటం గమనార్హం. ముఖ్యంగా అక్టోబర్-డిసెంబర్ త్రైమాసికంలో పెట్టుబడుల ప్రవాహం గణనీయంగా పెరిగినట్లు నివేదిక తెలిపింది. లండన్ బులియన్ మార్కెట్ అసోసియేషన్ (LBMA) గణాంకాల ప్రకారం, 2025 జనవరిలో బంగారం సగటు ధర ఔన్స్‌కు $2,709.7గా నమోదైంది. ఇది గత ఏడాది ఇదే కాలంలో ఉన్న $2,034 ధరతో పోలిస్తే భారీ పెరుగుదల.

కేంద్ర బ్యాంకుల కొనుగోళ్లు కీలకం

2025లో కేంద్ర బ్యాంకులు కూడా బంగారం కొనుగోళ్లలో కీలక పాత్ర పోషించాయి. అధికారిక రంగం మొత్తం 863 టన్నుల బంగారాన్ని నిల్వల్లో చేర్చుకుంది. అక్టోబర్-డిసెంబర్ త్రైమాసికంలోనే 230 టన్నులు కొనుగోలు చేయడం గమనార్హం. గత మూడేళ్లుగా 1,000 టన్నుల మార్క్ దాటకపోయినా, ప్రపంచ డిమాండ్‌లో కేంద్ర బ్యాంకుల వాటా ఇప్పటికీ కీలకంగానే ఉంది. పోలాండ్ నేషనల్ బ్యాంక్ వరుసగా రెండో ఏడాది అతిపెద్ద కొనుగోలుదారుగా నిలిచి 102 టన్నుల బంగారం కొనుగోలు చేసింది. కజకిస్తాన్ (57 టన్నులు), బ్రెజిల్ (43), అజర్‌బైజాన్ (38), టర్కీ (27), చైనా (27), చెక్ నేషనల్ బ్యాంక్ (20) తర్వాతి స్థానాల్లో ఉన్నాయి.

ధరల భారంతో ఆభరణాల డిమాండ్ తగ్గింపు

అధిక ధరల ప్రభావంతో 2025లో ప్రపంచ ఆభరణాల డిమాండ్ 18 శాతం తగ్గింది. అయితే, పరిమాణంలో తగ్గుదల ఉన్నప్పటికీ, విలువ పరంగా ఆభరణాల మార్కెట్ బలంగా నిలిచింది. మొత్తం విలువ 18 శాతం పెరిగి $172 బిలియన్లకు చేరింది. ఇది వినియోగదారులు అధిక ధరల వద్ద కూడా బంగారాన్ని ప్రాధాన్యంగా చూస్తున్నారనే సంకేతంగా విశ్లేషకులు భావిస్తున్నారు.

సరఫరాలోనూ రికార్డు

బంగారం సరఫరా కూడా కొత్త గరిష్టాన్ని తాకింది. గనుల ఉత్పత్తి 3,672 టన్నులకు పెరగగా, రీసైక్లింగ్ మాత్రం కేవలం 3 శాతం మాత్రమే వృద్ధి చెందింది. అధిక ధరలు ఉన్నప్పటికీ రీసైక్లింగ్ వేగం ఆశించిన స్థాయిలో పెరగలేదని డబ్ల్యూజీసీ తెలిపింది.

భవిష్యత్‌పైనా బంగారం పట్టు

"2025లో బంగారం డిమాండ్, ధరలు రెండూ బలంగా నిలిచాయి. ఆర్థిక, భౌగోళిక రాజకీయ రిస్క్‌లు ఇప్పుడు కొత్త సాధారణంగా మారాయి. ఈ పరిస్థితుల్లో పెట్టుబడిదారులు, వినియోగదారులు బంగారాన్ని సురక్షిత ఆశ్రయంగా ఎంచుకున్నారు. 67 శాతం వరకు ధరలు పెరిగినా, ఆభరణాల డిమాండ్ కేవలం 18 శాతం మాత్రమే తగ్గడం వినియోగదారుల విశ్వాసాన్ని చూపిస్తోంది. కేంద్ర బ్యాంకులు కూడా తమ నిల్వలను బలోపేతం చేసుకోవడంలో వెనుకాడటం లేదు. - డబ్ల్యూజీసీ అనలిస్ట్ లూయిస్ స్ట్రీట్.

అదేవిధంగా, "2026లో కూడా ప్రపంచవ్యాప్తంగా ఆర్థిక, భౌగోళిక రాజకీయ అనిశ్చితులు తగ్గే సూచనలు కనిపించడం లేదు. ఇప్పటికే ఈ ఏడాది మొదటి నెలలోనే బంగారం ఔన్స్‌కు $5,000 మార్క్ దాటడం, అనిశ్చిత కాలాల్లో బంగారం సురక్షిత పెట్టుబడి అనే పాత్రను మరోసారి రుజువు చేస్తోంది" అని లూయిస్ స్ట్రీట్ వ్యాఖ్యానించారు.

English summary

Global Gold demand crossed 5,000 tonnes in 2025, reaching an all-time high driven by a sharp rise in investment demand, central bank buying, and geopolitical uncertainty, according to the World Gold Council.