Swiggy: స్విగ్గీ షాకింగ్ నిర్ణయం.. లాభాలు లేకపోవడంతో ఏడాదికే..!

ప్రముఖ ఫుడ్ డెలివరీ సంస్థ స్విగ్గీ.. తన స్నాక్ యాప్ ను మూసేసింది. 10-15 నిమిషాల్లో ఆహారాన్ని అందించాలన్న లక్ష్యంతో ప్రారంభించిన 'Snacc' యాప్ ను లాభాలు లేకపోవడంతో ప్రారంభించిన ఏడాదికే క్లోజ్ చేసింది. ఈ సంస్థలో పనిచేసే ఉద్యోగులకు అందిన ఈమెయిల్ ద్వారా ఈ యాప్ ను మూసేస్తున్నట్లు వార్త బయటకు వచ్చింది. అయితే వ్యాపార వ్యూహాల్లో భాగంగానే ఈ యాప్ ను క్లోజ్ చేస్తున్నట్లు నిపుణులు అభిప్రాయపడుతున్నారు.

ప్రముఖ ఫుడ్ అండ్ గ్రాసరీ డెలివరీ యాప్ స్విగ్గీ తన 'స్నాక్' యాప్ సేవల్ని పూర్తిగా నిలిపివేసింది. ఫిబ్రవరి 19 (గురువారం) నుంచి ఈ యాప్ ను క్లోజ్ చేస్తున్నట్లు సంస్థ ప్రకటించింది. స్నాక్ యాప్ ప్రారంభమైన ఏడాదికే క్లోజ్ కావడం గమనార్హం. కేవలం 10-15 నిమిషాల్లో వినియోగదారులకు ఆహారాన్ని అందించాలన్న లక్ష్యంతో లాస్ట్ మినట్ ఫుడ్ డెలివరీ యాప్‌గా గతేడాది జనవరిలో బెంగళూరు కేంద్రంగా ఈ స్నాక్ యాప్ ప్రారంభమైంది.

ఇక స్నాక్స్, బెవరేజెస్, మినీ మీల్స్, డెజర్ట్స్ .. ఇలా సులభంగా, ఫాస్ట్ గా ఈజీగా అందివ్వగలిగే ఫుడ్ ఐటమ్స్‌ ను స్నాక్ యాప్ డెలివరీ చేసేది. కానీ ఈ సేవలకు సరైన ఆదరణ లభించలేదు. ఈ ఏడాది కాలంగా అనుకున్న లక్ష్యాన్ని చేరుకోలేదు. అలాగే ప్రతి ఆర్డర్‌ పై లాభాలను ఆర్జించడం కష్టంగా మారింది. వ్యాపారాన్ని భారీ స్థాయిలో విస్తరించడానికి అవుతున్న ఖర్చు ఎక్కువగా ఉండటంతో ఈ యాప్ ను క్లోజ్ చేస్తూ నిర్ణయం తీసుకున్నట్లు స్పష్టమవుతోంది.

అలాగే ఇతర వ్యాపార అవకాశాలపై దృష్టి పెట్టాలని ఈ నిర్ణయం తీసుకున్నట్లు స్విగ్గీ సంస్థ పేర్కొంది. అయితే తాము మాత్రం ప్రయోగాలు చేయడం ఆపబోమని ప్రకటించింది. ఇక ఈ యాప్ క్లోజ్ కారణంగా ఈ యాప్ లో పని చేసే ఉద్యోగుల భద్రత కోసం స్విగ్గీ సంస్థ కీలక నిర్ణయం తీసుకుంది.'స్నాక్' మూసివేత వల్ల ప్రభావితమైన ఉద్యోగులను కంపెనీలోని ఇతర విభాగాల్లోకి తీసుకుంటామని.. వారికి అవసరమైన సాయం అందిస్తామని భరోసా ఇచ్చింది.