మహిళలకు నిర్మలమ్మ బంపర్ ఆఫర్!

Union Budget 2026: దేశాభివృద్ధిలో మహిళల భాగస్వామ్యాన్ని మరింత పెంచేలా కేంద్ర ఆర్థిక శాఖ మంత్రి నిర్మలా సీతారామన్ పద్దు ప్రసంగంలో కీలక ప్రకటనలు చేశారు. ఇప్పటికే విజయవంతంగా కొనసాగుతున్న 'లఖపతి దీదీ' పథకాన్ని మరింత విస్తరించడంతో పాటు మహిళా పారిశ్రామికవేత్తల కోసం సరికొత్త 'షీ-మార్ట్' పథకాన్ని ఆర్థిక మంత్రి నిర్మలా సీతారామన్ ప్రారంభించారు.

షీ-మార్ట్ పథకం ఏంటి?
మహిళా స్వయం సహాయక సంఘాలు, చిన్న తరహా మహిళా పారిశ్రామికవేత్తలు తయారు చేసే ఉత్పత్తులకు సరైన మార్కెటింగ్ సౌకర్యం కల్పించడమే ఈ పథకం ముఖ్య ఉద్దేశం. దేశవ్యాప్తంగా మహిళా సంఘాలు, మహిళా పారిశ్రామికవేత్తలు తయారు చేసే ఉత్పత్తులను విక్రయించడానికి ప్రత్యేకంగా షీ-మార్ట్ పేరుతో రిటైల్ షాపులను ప్రభుత్వం ఏర్పాటు చేస్తుంది. తమ వ్యాపారాలను స్థిరపరచుకోవడానికి మహిళలు ఈ పథకం కింద చాలా తక్కువ వడ్డీకే రుణాలు పొందే వెసులుబాటు ఉంటుంది. గ్రామీణ, పట్టణ ప్రాంతాల్లోని మహిళలు తయారు చేసే వస్తువులను నేరుగా వినియోగదారులకు చేరవేసేలా ఈ మార్ట్‌లు వంతెనగా పనిచేస్తాయి.

'లఖపతి దీదీ' లక్ష్యం పెంపు
గత బడ్జెట్లో ప్రవేశపెట్టిన 'లఖపతి దీదీ' పథకం ద్వారా కోట్లాది మంది మహిళలు ఏటా రూ.లక్ష కంటే ఎక్కువ ఆదాయాన్ని పొందుతున్నారు. ఈ విజయాన్ని స్ఫూర్తిగా తీసుకున్న ప్రభుత్వం.. ఈ ఏడాది ఈ పథకం కింద మరెందరో మహిళలకు శిక్షణ, ఆర్థిక సాయం అందించాలని నిర్ణయించింది. కేవలం శిక్షణే కాకుండా వారు తయారు చేసిన వస్తువులను 'షీ-మార్ట్' ద్వారా విక్రయించేలా అనుసంధానం చేస్తారు.

మహిళా సాధికారతకు పెద్దపీట
ఈ బడ్జెట్‌లో మహిళల కోసం మరికొన్ని కీలక కేటాయింపులు కూడా జరిగాయి. మహిళా పారిశ్రామికవేత్తల కోసం ముద్రా రుణాల పరిమితిని పెంచడం ద్వారా కొత్త స్టార్టప్‌లకు ఊతం ఇవ్వనున్నారు. డ్రోన్ దీదీ (Drone Didi) వంటి పథకాల ద్వారా మహిళలకు ఆధునిక సాంకేతికతలో శిక్షణ ఇచ్చి, వారిని డ్రోన్ పైలట్లుగా తీర్చిదిద్దే ప్రక్రియను వేగవంతం చేస్తారు.

'నారి శక్తి'కి గ్యారంటీ!
మొత్తంగా, ఆదివారం నాడు ప్రవేశపెట్టిన ఈ బడ్జెట్ 'నారి శక్తి'నినాదాన్ని నిజం చేసేలా ఉందని విశ్లేషకులు అభిప్రాయపడుతున్నారు. 'షీ-మార్ట్' వంటి వినూత్న ఆలోచనల వల్ల మహిళలు కేవలం వస్తువులను తయారు చేయడమే కాకుండా, వాటిని విజయవంతంగా విక్రయించే వ్యాపారవేత్తలుగా ఎదగనున్నారు.

English summary

Budget 2026, FM Nirmala Sitharaman announces 'She-Marts' retail hubs and enhanced Mudra loan limits for women. Explore updates on Lakhpati Didi and Drone Didi schemes for Nari Shakti.