ఈ యాప్‌తో కేవలం 10 నిమిషాల్లోనే విమానం ఎక్కేయొచ్చు..!

హైదరాబాద్ : సాధారణంగా విమానాశ్రయాల్లో విమానం ఎక్కే ముందు ఎన్నో తనిఖీలు ఉంటాయి. లగేజ్ దగ్గర నుంచి టికెట్ వరకు. ఇందుకోసం పెద్ద క్యూలైనే ఉంటుంది. అయితే ఇప్పుడు విమానం ఎక్కాలంటే చాలా సింపుల్. ఈ క్యూలైన్లు ఇవన్నీ లేకుండా చాలా వేగంగా కూడా అన్ని ఫార్మాలటీలు పూర్తవుతాయి. అయితే ఇందుకోసం మీరు చేయాల్సిందల్లా మీ ఫోన్‌లో ఒక యాప్‌ను ఇన్స్‌టాల్ చేసుకోవడమే. ఇంతకీ ఆ యాప్ ఏంటో తెలుసా..?

విమాన ప్రయాణం అనగానే రెండు గంటల ముందే ఏర్పోర్ట్‌కు చేరుకుని ఫార్మాలిటీస్ పూర్తి చేయాల్సి ఉంటుంది. ఇందుకోసం క్యూలైన్లలో నిలబడితే సిబ్బంది వచ్చి లగేజ్, టికెట్ ఇవన్నీ చెక్ చేస్తారు. ఇదంతా క్షణాల్లో అయిపోవలంటే భారత ప్రభుత్వం ఒక యాప్‌ను విడుదల చేసింది. దీనిపేరు డిజియాత్ర యాప్ (Digiyatra APP). చివరి నిమిషంలో విమానం క్యాచ్ చేయడం,పెద్ద క్యూలైన్లలో నిలబడటం వంటి వాటికి ఈ యాప్ పరిష్కారం చూపుతుంది. ఎలానో తెలుసుకుందాం.

డిజి యాత్ర యాప్‌ను హైదరాబాద్‌కు చెందిన డేటాఇవాల్వ్ సొల్యూషన్స్ స్టార్టప్ సంస్థ తయారు చేసింది. నీతి ఆయోగ్ నిర్వహించిన అటల్ ఇనోవేషన్ మిషన్ (AIM)స్టార్టప్ ఛాలెంజ్‌లో ఈ స్టార్టప్ కంపెనీ సెలెక్ట్ అయ్యింది. డిజియాత్ర యాప్‌ను 2022 డిసెంబర్ 1న పౌరవిమానాయానశాఖ మంత్రి జ్యోతిరాదిత్య సింధియా ప్రారంభించారు. ఏప్రిల్ 2023లో బెంగళూరు నుంచి వారణాసికి తొలిదశలో ఈ యాప్‌ను ప్రయోగించారు. అనంతరం డిజి యాత్ర సేవలను విజయవాడ, కోల్‌కతా, హైదరాబాద్,పూణే విమానాశ్రయాలకు విస్తరించారు.ఒక్క జూన్ నెలలోనే దాదాపు 10 లక్షల మంది యూజర్లు ఈ యాప్‌ను డౌన్‌లోడ్ చేసుకుని రిజిస్టర్ చేసుకున్నారు.

ఇక విమానం ఎక్కే ముందు పూర్తికావాల్సిన లాంఛనాలు గంటల సమయం తీసుకుంటుంది. ఇప్పుడు డిజి యాత్ర యాప్‌తో అది కేవలం 10 నిమిషాల్లో అయిపోతుంది. ముందుగా డిజియాత్ర యాప్‌ను మీ స్మార్ట్‌ ఫోన్‌లో డౌన్‌లోడ్ చేసుకోవాలి. తర్వాత ఆధార్‌ కార్డ్‌ను,ఫేస్‌ఐడీని అప్‌లోడ్ చేయాలి. తర్వాత బోర్డింగ్ పాస్‌ను స్కాన్ చేయాలి. ఇదంతా అయ్యాక ఏర్పోర్ట్‌లో ప్రత్యేకంగా ఉంచిన డిజియాత్ర యాప్ కౌంటర్‌ దగ్గరకు వెళ్లి మీ బోర్డింగ్ పాస్‌ను స్కాన్ చేస్తే చాలు. ఇందుకు 3 నిమిషాల సమయం పడుతుంది.

ఇక బ్యాగేజ్ చెకింగ్‌కు ప్రత్యేకంగా ఏర్పాటు చేసిన కౌంటర్‌కు వెళితే అక్కడ 2 నిమిషాల్లో పనైపోతుంది. అనంతరం సెక్యూరిటీ చెక్ కోసం డిజియాత్ర సెక్యూరిటీ చెక్ వద్దకు నేరుగా వెళ్లొచ్చు.ఒక్కసారి సెక్యూరిటీ చెక్ అయిపోగానే మీ బోర్డింగ్ గేట్ వద్దకు చేరుకునేందుకు 3 నిమిషాలకంటే ఎక్కువ సమయం పట్టదు. అయితే ఇది కేవలం డొమెస్టిక్ జర్నీలకే పనిచేస్తుంది. ఇంకెందుకు ఆలస్యం డిజియాత్ర యాప్‌ను ఇన్స్‌టాల్ చేసుకుని కేవలం 10 నిమిషాల కంటే తక్కువ సమయంలో మీరు మీ ఫ్లయిట్‌ను బోర్డ్ చేయండి. మీ మిత్రులకు ఈ యాప్ గురించి చెప్పండి.

English summary

One can now board the domestic flight in just 10 minutes by using Digi yatra app.