చలికాలం రాకముందే మంచు అందాలను చూసొద్దాం రండి..
మనలో చాలామందికి మంచు కురిసే ప్రాంతాలకు వెళ్లడం, తెల్లటి మంచు తివాచీలా పరచుకున్న కొండల మధ్య గడపడం అంటే ఎంతో ఇష్టం. అయితే సాధారణంగా శీతాకాలం పీక్ స్టేజ్‌కి చేరినప్పుడు పర్యాటక ప్రదేశాలు కిటకిటలాడుతుంటాయి. జనసమర్థం ఎక్కువగా ఉండి ప్రశాంతత కరువవుతుంది. అందుకే అక్టోబర్, నవంబర్ నెలలు మంచును ముందే ఆస్వాదించడానికి అత్యంత అనువైన సమయంగా నిపుణులు చెబుతున్నారు.
హిమాలయాల ఎత్తైన ప్రాంతాలలో ఇప్పుడిప్పుడే చలిగాలులు వీస్తుండగా, పర్వతాలు తెల్లని రంగులోకి మారుతున్నాయి. కాశ్మీర్ నుంచి హిమాచల్ ప్రదేశ్, ఉత్తరాఖండ్ వరకు ఈ శీతాకాలంలో తొలుత మంచు కురిసే అద్భుతమైన 6 ప్రదేశాల వివరాలు మీకోసం.
1. గుల్మార్గ్ & అఫర్వత్ పీక్ (జమ్మూ కాశ్మీర్)
ఉష్ణోగ్రతలు ఒక్కసారిగా పడిపోవడంతో కాశ్మీర్‌లో తొలుత మంచును స్వాగతించే ప్రదేశాలలో గుల్మార్గ్ ముందుంటుంది. ప్రధాన పట్టణంలో చలి మొదలవ్వగానే, ప్రసిద్ధ గోండోలా రైడ్ ద్వారా అఫర్వత్ పీక్‌కి వెళ్తే మెరిసే తెల్లటి, మెత్తని మంచును కళ్లారా చూడవచ్చు. మంచుతో కప్పబడిన పర్వతాల నడుమ గడపడం పర్యాటకులకు సరికొత్త అనుభూతిని ఇస్తుంది.
2. రోహతాంగ్ పాస్ (హిమాచల్ ప్రదేశ్)
మణాలిని లాహౌల్ లోయతో కలిపే రోహతాంగ్ పాస్ ఎత్తైన ప్రాంతంలో ఉండటం వల్ల ఇక్కడ దిగువ లోయల కంటే ముందే మంచు కురుస్తుంది. మృదువైన మంచు పొరలతో కప్పబడిన కఠినమైన, అందమైన ప్రకృతి దృశ్యాలు ఎప్పటికీ మరువలేని అనుభూతిని ఇస్తాయి. అక్టోబర్, నవంబర్ నెలల్లో రాష్ట్రానికి వెళ్లే ప్రయాణికులు ఇక్కడ వింటర్ వాతావరణాన్ని, మంచు క్రీడలను ఆస్వాదించవచ్చు.
3. యుమ్‌థాంగ్ వ్యాలీ & జీరో పాయింట్ (సిక్కిం)
సిక్కిం ఉత్తర ప్రాంతంలో సముద్ర మట్టానికి 15,000 అడుగుల కంటే ఎక్కువ ఎత్తులో ఉన్న యుమ్‌థాంగ్ వ్యాలీ, జీరో పాయింట్‌లలో శీతాకాలం చాలా త్వరగా ప్రవేశిస్తుంది. ఇక్కడ అక్టోబర్ చివరి నాటికి, నవంబర్ అంతటా తరచుగా తాజా మంచు కురుస్తుంటుంది. మంచుతో కప్పబడిన నదీ ప్రవాహాలు, చల్లని గాలి ప్రకృతి ప్రేమికులకు అద్భుతమైన అనుభూతిని పంచుతాయి.
4. డ్రాస్ & ఖార్దుంగ్ లా (లడఖ్)
లడఖ్‌లోని ఎత్తైన ప్రాంతాలు, పర్వత మార్గాలు అక్టోబర్ నాటికి సున్నా కంటే తక్కువ ఉష్ణోగ్రతలను , స్థిరమైన మంచుపాతాన్ని అనుభవిస్తాయి. డ్రాస్ , ప్రసిద్ధ ఖార్దుంగ్ లా పాస్ వంటి ప్రదేశాలు ప్రశాంతమైన, మంచుతో నిండిన అద్భుత ప్రదేశాలుగా మారుతాయి. స్పష్టమైన నీలి ఆకాశం, ప్రశాంతమైన వాతావరణం ఇక్కడ ప్రత్యేకమైన అనుభవాన్ని అందిస్తాయి.
5. తవాంగ్ & సెలా పాస్ (అరుణాచల్ ప్రదేశ్)
సుదూర ఈశాన్య ప్రాంతంలో ఉన్న తవాంగ్ అక్టోబర్ చివరి నాటికి శీతాకాలానికి సిద్ధమవుతుంది. తవాంగ్‌కు ప్రవేశ ద్వారంగా ఉన్న ఎత్తైన సెలా పాస్‌లో క్రమం తప్పకుండా మంచు కురుస్తుంది. చుట్టూ ఉన్న పైన్ చెట్లు, ఎత్తైన సరస్సులు స్వచ్ఛమైన తెలుపు రంగులోకి మారుతాయి. సాంప్రదాయ సంస్కృతి, ఆరామాలు , మంచుతో కప్పబడిన ప్రకృతి దృశ్యాలు నవంబర్‌లో అన్వేషించడానికి దీనిని అద్భుతమైన ప్రదేశంగా మారుస్తాయి.
6. ఔలి (ఉత్తరాఖండ్)
దేశంలోని అత్యుత్తమ స్కీయింగ్ డెస్టినేషల్ లలో ఒకటిగా పేరుగాంచిన ఔలి , దాని చుట్టూ ఉన్న హిమాలయ ప్రాంతాలు నవంబర్ మధ్య నాటికి తాజా మంచును సంతరించుకుంటాయి. ఈ సమయంలో వచ్చే ప్రయాణికులు నందాదేవి వంటి మంచుతో కప్పబడిన శిఖరాల అందాలను, చల్లని పర్వత వాతావరణాన్ని, ప్రశాంతమైన కేబుల్ కార్ రైడ్స్‌ను ఆస్వాదించవచ్చు.
Click it and Unblock the Notifications
Sign in with Google
