Video: అమ్మ ప్రేమ ముందు ఓడిన నది.. కన్నీళ్లు తెప్పించే తల్లి ఏనుగు ఆవేదన!

అది ఆర్తనాదాలు మిన్నంటిన క్షణం.. ఉగ్రరూపం దాల్చిన నది మరణ మృదంగం వాయిస్తోంది! ఉరకలెత్తుతున్న వరద నీరు గట్టును దాటి ప్రవహిస్తుంటే, ఆ ప్రవాహాన్ని దాటేందుకు ఓ ఏనుగుల గుంపు తీవ్రంగా శ్రమిస్తోంది. అంతలోనే విధి విసిరిన పంజాలా ఒక భారీ అల విరుచుకుపడింది! గుంపు నడుమ ఉన్న కేవలం నాలుగు రోజుల పసికూన అయిన ఏనుగు పిల్ల, ఆ ఉధృతికి ప్రవాహంలో కొట్టుకుపోయింది. తల్లి ఏనుగు ఆవేదనతో ఘీంకరించినా, పొంగిపొర్లుతున్న వరదను ఎదురించి బిడ్డను కాపాడుకోలేక ఒడ్డున విలవిలలాడింది. నది రాకాసి ప్రవాహంలో ఆ పసి ప్రాణం ఏకంగా నాలుగు కిలోమీటర్ల మేర కొట్టుకుపోతూ, ప్రతి క్షణం చావుబతుకుల మధ్య పోరాటం సాగించింది!

మరోవైపు నదిలో కొట్టుకుపోతూ, నీళ్లలో మునిగిపోతున్న ఆ చిన్నారి గజాసురుణ్ణి గమనించిన స్థానిక మత్స్యకారుల గుండెలు తల్లడిల్లిపోయాయి. క్షణం ఆలస్యమైనా ఆ పసి ప్రాణం నది ఒడిలోనే కలసిపోతుందని గ్రహించారు. ఏ మాత్రం ఆలోచించకుండా, సొంత ప్రాణాలను సైతం పణంగా పెట్టి చిన్న పడవలో ఉప్పొంగుతున్న నదిలోకి దూసుకెళ్లారు!

నది అలలతో పోరాడుతూ, ఊపిరి ఆడక కొట్టుమిట్టాడుతున్న ఏనుగు పిల్లను అతి కష్టం మీద పడవలోకి లాక్కొచ్చారు. ఆ వెంటనే అటవీశాఖ అధికారులకు సమాచారం అందించగా, బైకాంత్‌పూర్ డీఎఫ్‌ఓ ముదిత్ కుమార్ నేతృత్వంలోని బృందం క్షణాల మీద అక్కడికి చేరుకుని ప్రాథమిక వైద్య పరీక్షలు నిర్వహించింది. అదృష్టవశాత్తూ ఆ పసిపిల్లకు ఎలాంటి గాయాలు కాకపోవడంతో అధికారులు ఊపిరి పీల్చుకున్నారు.

కన్నీళ్లు తెప్పించే తల్లి ప్రేమ సీన్!

అయితే అసలైన సవాలు ఇక్కడే మొదలైంది! మనుషుల వాసన ఎక్కువసేపు తగిలితే తల్లి ఏనుగు ఆ పిల్లను తన బిడ్డగా అంగీకరించక తిరస్కరించే ప్రమాదం ఉంది. దీంతో అధికారులు అత్యంత వేగంగా, పక్కా ప్రణాళికతో ఏనుగుల గుంపు ఉన్న గజాల్‌డోబా అటవీ ప్రాంతానికి ఆ పసికూనను తీసుకెళ్లారు. కళ్లెదుటే నదిలో కొట్టుకుపోయిన బిడ్డను చూసి దిక్కుతోచని స్థితిలో ఆవేదనతో రగిలిపోతున్న తల్లి ఏనుగు ముందర ఆ పిల్లను ఉంచారు.

కళ్లముందు తనన బిడ్డను చూడగానే ఆ తల్లి ఏనుగు పొందిన ఆనందానికి హద్దులు లేవు! సినిమా చివర్లో వచ్చే స్లో ఎమోషన్ తో వచ్చి, ప్రేమగా నిమిరి, తన బిడ్డకు పాలు ఇచ్చి గుండెలకు హత్తుకుంది. చావు అంచుల వరకు వెళ్లి మళ్లీ తల్లి ఒడికి చేరిన ఆ దృశ్యం చూసి అటవీశాఖ అధికారులు, మత్స్యకారులు భావోద్వేగానికి గురయ్యారు. ప్రస్తుతం ఈ ఎమోషనల్ వీడియో నెట్టింట వైరల్ అవుతూ నెటిజన్ల కళ్లను చెమ్మగిల్లుస్తోంది.